राज्यमन्त्री सिंह भन्छन्- राजसंस्थाको एजेण्डाका लागि सरकारभित्रै संघर्षरत छौं (भिडिओ)

काठमाडौं । ऊर्जा, जलस्रोत तथा सिँचाइ राज्यमन्त्री दीपकबहादुर सिंहले राजसंस्थाको एजेण्डा पारित गर्न सरकारभित्रै बसेर सरकारसँग संघर्ष गरिरहेको बताएका छन् ।

राप्रपा कार्यसम्पादन समितिको बैठकका क्रममा सञ्चारकर्मीहरुसँग कुरा गर्दै उनले जनताका बीचमा जाँदा आफूहरुले राष्ट्रपतिमा भोट हाल्छु या हाल्दिन केही नभनेको बताए ।

राप्रपाले राष्ट्रपतिलाई भोट हाल्न आफ्नो एजेण्डा छाड्नुपर्ला नि भन्ने सञ्चारकर्मीको प्रश्नमा उनले भने, ‘पर्दैन यसअघि पनि राप्रपाले राष्ट्रपतिलाई भोट हालेको थियौं । जनताका बीचमा जाँदा हामीले राष्ट्रपतिमा भोट हाल्छु पनि भनेको छैन हाल्दिनँ पनि भनेको छैन ।’

उनले आफ्नो एजेण्डाका लागि सरकारभित्रै बसेर संघर्ष गरिरहेको बताए । ‘हिजोपनि गणतन्त्रवादीहरु गिरिजा नेतृत्वको सरकारमा जाँदा ढाडमा टेकेर टाउकोमा हान्छु भनेर प्रचण्डजी सरकारमा जानुभयो। अहिले हाम्रो एजेण्डा पारित गर्नको लागि सरकारभित्र बसेर संघर्ष गरिहेका छौं’ उनले भने ।