शेखरको टिमले पत्रकार सम्मेलन गर्दै, शशांकको पनि सम्बोधन

काठमाडौं । नेपाली कांग्रेसका सभापतिका दाबेदार डा. शेखर कोइरालासहितको टीमले पत्रकार सम्मेलनको आयोजना गरेको छ ।

अहिले साँझ ५ बजे बत्तिसपुतलीस्थित अनुपम फुडल्याण्डमा आयोजना गरिने पत्रकारसँगको भेटघाट कोइरालासहित उनका प्यानलका पदाधिकारी उम्मेदवारहरू सहभागी हुने छन् । उक्त टिमले आफ्नो उम्मेदवारीको औचित्यबारे प्रष्ट्याउनेछ ।

सो कार्यक्रममा डा. शशांक कोइराला पनि उपस्थित हुन बताइएको छ । सभापतिमा दाबी छाडेका शशांकले शेखरको पक्षमा मतदानका लागि आव्हान गर्ने बताइएको छ ।

शेखरको टिमबाट उपसभापतिमा चन्द्र भण्डारी र धनराज गुरुङ उम्मेदवार बनेका छन् भने महामन्त्रीमा डा. मिनेन्द्र रिजाल र गगन थापा उम्मेदवार बनेका छन् ।

सहमहामन्त्रीमा दलिततर्फ जीवन परियार, महिलातर्फ कमला पन्त, मधेशीतर्फ रामकृष्ण यादव मैदानमा छन् ।

यस्तै थारुतर्फ टिएल चौधरी, पिछडिएको क्षेत्रबाट बद्री पाण्डे, जनजातितर्फ विकास लामा, मुस्लिमतर्फ शेख वकील र खसआर्थबाट देवराज चासिले सहमहामन्त्रीका उम्मेदवार बनेका छन् ।