ओलीको आरोप – एमाले भलाइमा गरिएका कामको माधव गिरोहले अपमान गर्‍यो

काठमाडौं । नेकपा एमालेका अध्यक्ष केपी शर्मा ओलीले वरिष्ठ नेता माधव नेपाल र उनको समूहलाई गिरोहको संज्ञा दिँदै पार्टी भलाइका लागि गरिएका असल प्रयासको अपमान गरेको आरोप लगाएका छन् ।

एमालेको १० औं र ११ औं केन्द्रीय कमिटी बैठकका निर्णय कार्यान्वयन गर्न जारी गरिएको अन्तर पार्टी निर्देशन भनिएको छ, ‘माधव नेपाल र उनको गिरोहले देश, जनता र पार्टीको भलाइको असल मनसायका साथ गरिएका सम्पूर्ण प्रयासहरूलाई तिरस्कार र अपमान गर्दै अश्वीकार गर्‍यो । यसरी समस्या समाधानका हाम्रा प्रयासहरू असफल भए ।’

अपानीमा माधव नेपाल समूहले खुलेआम गुटगत भेला गरेको र पार्टी फुटाउने उद्देश्यले माथिदेखि दलसम्म समानान्तर कमिटी गठन गरिएको उल्लेख गरिएको छ । भनिएको छ, ‘माधव गुटले खुलेआम गुटगत भेला, बैठकहरू गर्ने, पार्टी फुटाउने उद्देश्यले माथिदेखि तलैसम्म पार्टी र जनवर्गीय संगठनका कमिटीहरू समानान्तररूपमा गठन गर्ने, विपक्षीहरूसँग मिलेर देशैभरि सम्माननीय राष्ट्रपति, प्रधानमन्त्री एवं पार्टी अध्यक्षका पुत्ला दहन गर्ने, पार्टी र पार्टी नेतृत्वका विरुद्ध झुठा, अभद्र र अमर्यादित प्रचार अभियान चलाउनेजस्ता आपराधिक कार्यहरू गर्दैरहे ।’

त्यस्ता गतिविधिहरूलाई रोक्न पार्टीका तर्फबाट अनकौं प्रयासहरू लगातार गरिएको सो दस्तावेजमा उल्लेख छ। ‘फोनमा कुराकानी, भेटघाट र छलफलका सिलसिला चलाइए,’अध्यक्ष ओलीद्वारा हस्ताक्षरित अपानीमा भनिएको छ, ‘यसै प्रसंगमा कार्यदल बनाइयो र त्यसले समस्या समाधानको लागि सर्वसम्मत सिफारिस पनि गर्‍यो । पार्टीले त्यसलाई ग्रहण पनि गर्‍यो ।’

कुनै पनि दुष्प्रयासहरूबाट हरेस नखाइ पार्टी अघि बढ्ने उल्लेख गरिएको छ ।