पहिरो खस्दा राप्ती राजमार्गमा ४ वटा गाडीमा क्षति

रुपन्देही । दाङ-सल्यान सडकखण्डको कपुरकोट गाउँपालिका ३ बसारे नजिकै राप्ती राजमार्ग अन्तर्गतको सडकमा आएको पहिरोले ४ वटा गाडीमा क्षति पुर्‍याएको छ ।

जिल्ला प्रहरी कार्यालय सल्यानले पहिरोले सडक अवरुद्ध भएपछि रोकी राखेका रा १ ज १६२ नम्बर को एम्बुलेन्स, ना १ ख ८७८६ नम्बर को टिप्पर, एउटा ट्रक र एउटा मिनिट्रकमा माथीबाट खसेको पहिरोले क्षति पुर्याएको जनाएको छ ।

सडक अवरुद्ध हुँदा बाटोमा रोकी राखेको अवस्थामा सडक माथिबाट ठूलो पहिरो आउँदा टिप्पर आधा पुरिएको छ भने एम्बुलेन्सको सिसा फुटेको प्रहरीले जनाएको छ । प्रहरी चौकी कपुरकोटबाट प्रहरी नायब निरीक्षक यामबहादुर बस्नेतको कमाण्डमा ५ जनाको प्रहरी टोली खटिएर जेसीबिद्वारा गाडी निकालिएको छ । पहिरोका कारण दुई दिनदेखि राजमार्ग अवरुद्ध भएको छ ।

केही समय पहिरो पन्छ्याए पनि फेरि पहिरो झर्ने क्रम जारी रहेकोले राजमार्ग अवरुद्ध छ । निरन्तर पानी परिरहँदा सडक खुलाउन समस्या भएको प्रहरीको भनाइ छ । मेसिन लगाएर सडक खुलाउने प्रयास भइरहे पनि पहिरो झरी रहेकाले समस्या भएको हो ।