आफू शासनमा पुग्न नपाएपछि प्रतिगमनको स्यालहुइँया : प्रधानमन्त्री ओली

काठमाडौं । प्रधानमन्त्री केपी शर्मा ओलीले देश प्रगतिको दिशामा अगाडि बढिरहेका बेला प्रतिगमन भयो भन्दै स्यालहुइया नमच्चाउन चेतावनी दिएका छन् । उनले आफूलाई अझै राम्रोसँग काम गर्न नदिइएको बताए ।

मेलम्ची खानेपानीको उद्घाटन कार्यक्रममा बोल्दै ओलीले भने, ‘अब जनताको चेतना जागेका बेला कसैले पनि प्रतिगमन भयो भन्ने स्याल हुइया नमच्चाउँदा हुन्छ । के हो यो प्रतिगमन भन्या ? ख्यालठट्टा हो ? किन अनावश्यक स्यालहुइँया मच्चाइँदैछ ? जनता अल्मल्याउने ? कोही शासनमा पुग्दा क्रान्ति हुने, कोही पुग्न नपाए प्रतिगमन ?’

कसैका व्यक्तिगत आकांक्षा परिपूर्ति नहुँदा ‘संविधान मासियो, गणतन्त्र-संघीयता ध्वस्त पारियो’ भन्दै हल्ला गरिएको ओलीले बताए ।

सर्वोच्चबाट संसद पुनर्स्थापना भए पनि यसले कुनै काम गर्न नसकेको उनको भनाइ छ ।

‘संसद विभिन्न स्वार्थका तानातानको थलो भएको छ । केही बलिया व्यक्तिका स्वार्थका तानातानको थलो संसद हुनुहुँदैन,’ ओलीले भने ।

उनले थपे, ‘मैले पहिले भनेको थिएँ, सरकारलाई काम गर्न दिइएको छैन । अहिले पनि काम गर्न दिइया छैन ।’