दिल्लीमा परराष्ट्रमन्त्री ज्ञवालीको उच्चस्तरीय राजनीतिक भेटवार्ता हुँदै

काठमाडौं । नेपाल भारत संयुक्त आयोगको बैठकमा भाग लिन नयाँ दिल्ली पुगेका परराष्ट्रमन्त्री प्रदीपकुमार ज्ञवालीले आज उच्चस्तरीय राजनीतिक भेटवार्ता गर्ने भएका छन् ।

आजै अपराह्न स्वदेश फर्किन लागेका ज्ञवालीले आजै केहीबेरमा भारतका रक्षामन्त्री राजनाथ सिंहसँग भेट गर्दैछन् । प्रधानमन्त्री नरेन्द्र मोदीपछिको बरियताका नेता राजनाथ सिंह नेपाल मामिलाका विज्ञ पनि हुन् ।

नेपालको पछिल्लो राजनीतिक घटनाक्रमका बारेमा छलफल गर्न भारतीय पक्षले मन्त्री ज्ञवालीसँग उच्चस्तरीय भेट तय गरेको हो । दुवै देशको नक्सा विवादपछि चिसिएको सम्बन्ध सुधार गर्नलाई भेटवार्ता सहयोगी हुने अपेक्षा गरिएको छ ।

मन्त्री ज्ञवालीको प्रधानमन्त्री नरेन्द्र मोदीसँग पनि भेट हुन सक्ने भारतीय सञ्चारमाध्यमहरुले जनाएका छन् । तर यसको आधिकारिक पुष्टि भएको छैन । यसैबीच, आजै विहान परराष्ट्रमन्त्री ज्ञवालीले भारतीय संचारकर्मीसँग दिल्लीस्थित नेपाली दुतावासमा पत्रकार सम्मेलन गरे ।