कति नजिकका दाजुभाइ हुन् प्रचण्ड र नारायण दाहाल ?

चितवन । राष्ट्रियसभा अध्यक्षमा नेकपा माओवादीले सर्वसम्मत नाम टुंग्याएर बहुमतले विजयी भएका नारायण दाहाल र प्रधानमन्त्री प्रचण्डबीच दाजुभाइको सम्बन्धलाई लिएर सामाजिक सञ्जालमा टिप्पणी भइरहेको छ ।

प्रचण्ड र नारायण दाहालको परिवारका सदस्यहरूसँगै बुझ्दा उनीहरू तीन पुस्ते दाजुभाइ रहेको खुलेको छ । प्रचण्ड र नारायण दाहालको हजुरबुबा एकाघरको दाजुभाइ रहेको नारायण दाहालका माहिला भाइ नन्दलाल दाहालले नेपाल प्रेसलाई जानकारी दिए ।

नन्दलालका अनुसार प्रचण्डका हजुरबुबा नरपति जेठा हुन् । भने नारायण दाहालका हजुरबुबा पुनराम दाहाल माहिला हुन् । उनीहरूका तीन दाजुभाइ थिए । एक भाइ सानैमा बितेर दुई भाइको मात्रै घरजम भएको उनले बताए ।

यो पनि पढ्नुहोस् : ०२७ सालदेखि राजनीति गरेका नारायण दाहालः दाइ प्रचण्डसँगै संवैधानिक पदमा बहाल

भने प्रचण्डको बुबा मुक्तिलाल र नारायण दाहालका बुबा कुलप्रसादका बुबाआमा फरक-फरक हुन् । भने मुक्तिलालका दुई भाइ छोरामध्य प्रधानमन्त्री पुष्पकमल दाहाल ‘प्रचण्ड’ र उनका साख्खै भाइ गंगाराम दाहाल हुन् । गंगारम अहिले बेलायतमा छन् ।

कुलप्रसादका चार भाइ छोरा हुन् । तीमध्ये जेठो नारायण दाहाल आज राष्ट्रियसभा अध्यक्ष निर्वाचित भएका छन् । त्यसैगरी माइला भाइ नन्दलाल नेकपा माओवादीकै बागमती प्रदेश सचिवालय सदस्य हुन् । साहिँला रामचन्द्र र कान्छा केशव सक्रिय राजनीतिमा छैनन् । नन्दलालका अनुसार रामचन्द्र किसान हुन् भने केशव अहिले छोरीहरूसहित अष्ट्रेलियामा बस्दै आएका छन् ।