माओवादी वागमती संसदीय दलको नेता आज पेरिसडाँडाले टुंग्याउने

हेटौँडा । नेकपा माओवादी केन्द्र वागमती प्रदेश संसदीय दलको नेता छान्न शुक्रबार काठमाडौंमा बसेको बैठकमा सहमति नजुटेपछि आज माओवादी केन्द्रको केन्द्रीय कार्यालय पेरिसडाँडामा ‘फाइनल मिटिङ’ हुने भएको छ ।

शुक्रबारको बैठकमा पोलिटब्युरो सदस्य तथा पूर्व संसदीय दलका नेता शालिकराम जम्कट्टेल, पूर्व मन्त्री युवराज दुलाल, प्रदेश अध्यक्ष सरल सहयात्री पौडेल र नेता गंगानारायण तुलाधरले दाबी नछोडेपछि बैकठ निस्कर्षविहिन बनेको थियो ।

शुक्रबार निस्कर्षविहिन  बनेको बैठक शनिबार १ बजे केन्द्रीय कार्यालयमा हुने र आजको बैठकले सर्वसम्मति वा प्रक्रियाबाट दलको नेता चयन गर्ने माओवादी केन्द्र बागमती प्रदेशका उपाध्यक्ष तथा प्रदेश सांसद प्रेमबहादुर पुलामीमगरले नेपालप्रेसलाई बताए ।

उनले भने, ‘हामीले सहमति भएको अवस्था र निर्वाचन भएको अबस्था जुनसुकै भएपनि आज कुनैपनि हालतमा दलको नेता छान्ने कुरा निश्चित छ र आज दिउँस १ बजे दलको नेता छनोट गरेर हेटौँडा फर्कन्छौँ ।’

गत पाँच वर्ष दलको नेता भएका जम्कट्टेल र यो पटक मात्र प्रदेशसभामा विजयी भएका पौडेलबीच अन्तिम प्रतिस्पर्धा हुने देखिएको माओवादी निकट स्रोतको दाबी छ । माओवादीका केही नेताहरु अवसरको बाँडफाँड सधै एउटै ब्यक्तिलाई गर्न नहुने पक्षमा छन भने एउटा पक्ष पाँच वर्ष दलको नेता भएका अनुभवी ब्यक्तिलाई एक पटक पुनः अवसर दिनुपर्ने पक्षमा रहेका छन् ।