काठमाडौंमा माओवादीलाई भन्दा लौरोलाई धेरै भोट

काठमाडौं । मंसिर ४ मा सम्पन्न निर्वाचनमा काठमाडौं जिल्लामा समानुपातिकतर्फ नेकपा माओवादी केन्द्रले भन्दा बढी मत लौरो अभियानले पाएको छ ।

काठमाडौं प्रदेशसभामा राष्ट्रिय प्रजातन्त्र पार्टीले अग्रता कायम गरिरहँदा नेकपा एमाले दोस्रो स्थानमा छ भने नेपाली कांग्रेस तेस्रोमा रहेको छ ।

राप्रपाले ८९ हजार ७०८ मत ल्याउँदा एमालेले ८८ हजार २२५ मत प्राप्त गरेको छ भने कांग्रेस ८५ हजार ३३६ सहित तेस्रो स्थानमा छ ।

प्रतिनिधिसभामा प्रत्यक्षतर्फ नतिजा नल्याएको हाम्रो नेपाल पार्टी (लौरो अभियान) का उम्मेदवार शैलेन्द्रमान बज्राचार्यले काठमाडौं ८ को प्रदेशसभा १ मा विजयी हासिल गरेका छन् । उनले पाँच हजार ४७० मतसहित निर्वाचित हुँदा उनका निकटतम प्रतिस्पर्धी एमालेका राजेश शाक्यले तीन हजार ७१८ मत ल्याएका छन् ।

समानुपातिकतर्फ प्रतिनिधिसभामा देशभरबाट ५४ हजार १० मत प्राप्त गरेको हाम्रो नेपालले सबैभन्दा धेरै वागमती प्रदेशमा ल्याएको छ । सो पार्टीले वागमती प्रदेशमा ४६ हजार ५७४ मत प्राप्त गरेको छ भने सबैभन्दा कम कर्णाली प्रदेश जहाँ एक हाजर ६६२ मत ल्याएको छ । त्यस्तै, लुम्बिनीमा २७ हजार ७०४ मत हाम्रो नेपाल पार्टीमा परेको छ भने गण्डकीमा १८ हजार ४६६ मत हासिल गर्न सफल भएको छ ।

लौरो अभियान वागमती प्रदेशमा सातौं स्थानमा छ ।

काठमाडौं जिल्लामा भने सत्तारुढ घटक नेकपा माओवादी केन्द्रभन्दा अगाडि रहेको छ । हाम्रो नेपाल पार्टीले जिल्लामा २४ हजार ९८४ मतसहित चौथो स्थानमा ओगट्दा माओवादी केन्द्र २० हजार १९४ मत ल्याउँदै पाँचौं स्थानमा रहेको छ ।