धितोपत्र बोर्डको अध्यक्षमा निरज गिरी नियुक्त

काठमाडौं । नेपाल धितोपत्र बोर्डको अध्यक्षमा बोर्डकै कार्यकारी निर्देशक निरज गिरी नियुक्त भएका छन् ।

बोर्डका पूर्वअध्यक्ष भिष्मराज ढुंगाना निलम्बनमा परेपछि अर्थमन्त्रालयले बोर्डको जिम्मेवारी गिरीलाई सुम्पेको हो । बोर्डकी डिपुटी कार्यकारी निर्देशक दीपा दाहालका अनुसार नवअध्यक्ष गिरीले बोर्डको दैनिक कमकाज र बोर्डको बैठक बोलाउन सक्नेछन् । त्यसबाहेकका कामको जिम्मेवारी भने अहिले मन्त्रालयले तोकिनसकेको उनले बताइन् ।

बोर्डमा अध्यक्ष नहुँदा दैनिक कामकाज र बैठक बस्ने काम प्रभावित भएको थियो ।

सर्वोत्तम सिमेन्टको सेयर चलखेल प्रकरणमा मुछिएपछि सरकारले समिति गठन छानविन थालेपछि ढुंगाना निलम्बनमा परेका छन् ।  बोर्डका अध्यक्षको पद खाली रहेको अवस्थामा वरिष्ठ कर्मचारीलाई नै नेतृत्वको जिम्वेवारी दिने व्यवस्थाअनुसार गिरीलाई अध्यक्षको जिम्मेवारी दिइएको हो ।