अमेरिकासँगको कूटनीतिक तनावका बीच उत्तर र दक्षिण कोरियाबीच संवाद सुरु

काठमाडौं । तीनवर्ष लामो संवादहिनतापछि दक्षिण र उत्तर कोरिया सम्बन्ध सुधारका लागि संवाद सूत्रहरुलाई सक्रिय बनाउन सहमत भएका छन् । आणविक हतियारलाई लिएर अमेरिकासँगको रस्साकस्सीबीच यी दुई छिमेकी मुलुक सम्बन्ध सुधारमा अघि बढेका हुन् ।

यो कदमले कोरियाली प्रायद्धीपमा तत्कालका लागि राहत मिल्ने अपेक्षा गरिएको छ ।

तर, उत्तर कोरिया दक्षिणसँग यसअघि भएका सहमतिलाई पालना गर्न तयार हुनेछ वा छैन भन्ने कुरा निश्चित छैन । साथै, आणविक हतियारलाई लिएर अमेरिकासँगको कूटनीतिक वार्ता अघि बढ्छ वा बढ्दैन भन्ने कुरा पनि यकिन छैन ।

गत अप्रिलदेखि नै किमजोङ उन र दक्षिण कोरियाली राष्ट्रपति मुन जे इन सम्बन्ध विस्तारका लागि सीमापार शान्ति कायम गर्नेभन्दै थुप्रैपटक पत्र आदानप्रदान गरिरहेका छन् ।

‘दुबै नेताहरु आपसी विश्वासलाई पुनस्थापित गर्दै जतिसक्दो चाँडो सम्बन्धलाई सुधार्नेतर्फ सहमत भएका छन्’ दक्षिण कोरियाली राष्ट्रपति कार्यालय ब्लुहाउसका अधिकारी पार्क सो हङले टेलिभिजन सम्बोधनमा भने । उनका अनुसार दुबै कोरियाली मुलुकहरुले मंगलबार बिहानदेखि संवादको औपचारिक थालनी गरेका छन् । दक्षिणको घोषणासँगै उत्तर कोरियाले पनि यसलाई पुष्टि गरेको थियो ।