युरो २०२०: इङ्ल्यान्डको विजयी सुरुआत

काठमाडौं । क्रोएसियालाई १-० गोलको नतिजामा पराजित गर्दै युइएफए युरो २०२० मा इङ्ल्यान्डले विजयी सुरुआत गरेको छ । समूह ‘डी’ अन्तर्गत इङ्ल्यान्डको वेम्ब्ली स्टेडियममा भएको खेलमा घरेलु टोलीले विश्वकप २०१८ को उपविजेताविरुद्ध १-० को संघर्षपूर्ण जित निकाल्यो ।

इङ्ल्यान्डलाई जित दिलाउन राहिम स्टर्लिङले एक मात्र निर्णायक गोल गरे । पहिलो हाफ गोलरहित बराबरीमा टुङ्गिएको खेलको ५९औं मिनेटमा स्टर्लिङले गरेको एक मात्र गोल इङ्ल्यान्डलाई महत्त्वपूर्ण जित दिलाउन पर्याप्त भयो ।

उनले काल्भिन फिलिप्सको पासलाई पेनाल्टी एरिया भित्रबाट प्रहार गर्दै सोझै गोलमा परिणत गरेका थिए ।

जितसहित प्रतियोगिताको सुरुआत गरेको इङ्ल्यान्डले दोस्रो खेलमा शनिबार स्कटल्यान्डको सामना गर्नेछ । यस्तै पराजित क्रोएसिया शुक्रबार हुने आफ्नो दोस्रो खेलमा चेक गणतन्त्रविरुद्ध पहिलो जितको खोजीमा हुनेछ ।