हामी इङ्ल्यान्डमाथि हाबी भयौं: मान्चिनी

काठमाडौं । प्रशिक्षक रोबर्टो मान्चिनीले इटाली इङ्ल्यान्डमाथि हाबी भएको संकेत गर्दै आफ्ना ‘एक्सट्राअर्डिनरी’ खेलाडीको प्रसंशा गरेका छन् ।

इटालीले वेम्ब्ली स्टेडियममा आइतबार राति भएको फाइनलमा पेनाल्टीमा ३-२ गोलको नतिजामा जित निकाल्दै ५३ वर्षपछि युरोपियन च्याम्पियनसिपको उपाधि जितेको थियो ।

निर्धारित र अतिरिक्त समयको खेल १-१ गोलको बराबरीमा रोकिएसँगै खेल पेनाल्टी सुटआउटमा पुगेको थियो । इङ्ल्यान्डका तीन खेलाडी पेनाल्टीमा गोल गर्न नसक्दा उपाधि इटालीको पक्षमा परेको थियो ।

इटालियन प्रशिक्षक मान्चिनीले १२० मिनेट इङ्ल्यान्डविरुद्ध खेलिसकेपछि ‘इटाली जितको हकदार भएको’ प्रतिक्रिया दिएका छन् ।

‘यो सोच्दा अपत्यारिलो लाग्थ्यो, तर हाम्रा खेलाडीहरू ‘एक्स्ट्राअर्डिनरी’ रहे,’ उनले भने, ‘उनीहरूलाई भन्न मसँग कुने शब्द छैन, यो एक अद्भूत समूह छ, यो सहज खेल थिएन, उनीहरू एकदमै कठिन प्रतिद्वन्दी थिए । तर, हामीले डोमिनेट गर्‍यौं ।’