कोशीमा आङ्वोलाई मुख्यमन्त्री बनाउने प्रचण्डको प्रयास, इन्चार्ज खनाल भन्छन्- गठबन्धनमा सहमति जुटिसक्यो

काठमाडौं । सत्ता गठबन्धनमा कोशी प्रदेश सरकारको नेतृत्व माओवादी केन्द्र लिने भएको छ । सत्ता गठबन्धनमा भएको सहमति अनुसार माओवादीका कोशी संसदीय दलको नेता इन्द्र आङ्वोलाई मुख्यमन्त्री बनाउन बालुवाटारमा सहमति जुटेको हो ।

कोशी सरकारबारे माओवादीको नेतृत्वमा गठन गर्ने लगभग सहमति भइसकेको माओवादी कोशी प्रदेश इन्चार्ज चक्रपाणि खनालले बताए ।

उनले भने, ‘अहिले पनि छलफल चलिरहेको छ। माओवादी नेतृत्वमा सरकार बनाउन करिब करिब सहमति भइसकेको छ। तर, अहिले सबैको टुंगियो भन्न सकिँदैन। कांग्रेसले पनि तपाईँहरूको नेतृत्वमा सहमति जुट्छ भने हामीलाई आपत्ति छैन भनिसक्नुभएको छ।’

उनले कांग्रेसले आफूहरूलाई सरकारको नेतृत्व दिन तयार भएपछि आन्तरिक रूपमा अझै विवाद रहेको स्वीकारे ।

उनले भने, ‘शेखरजीको टिम सोमबार प्रधानमन्त्रीकहाँ जानुभएको थियो । उहाँले हामीलाई पहिले सहयोग गर्नुपर्‍यो भन्नुभएको रहेछ ।’

उनले कांग्रेसको नीति अनुसार दलको नेता नै मुख्यमन्त्री बन्ने विधान भएकाले शेखर पक्षले भनेको कुरामा सहमति बन्न नसकेको उनको बुझाइ छ ।

उनले थपे, ‘अहिले मध्यावधिमा जानसक्ने अवस्था छैन । सबै दल सहमत नै छन् । अहिले जहाँ सहमति जुट्छ त्यही गरौं भन्ने हाम्रो प्रस्ताव थियो। तर, हाम्रो पार्टी नेतृत्व लिनेबारे छलफल भएको छ।। त्यसबारे बिहान पनि छलफल भइरहेको छ ।’

उनले आफ्नो पार्टीको नेतृत्वमा सरकार बनाउने विषयमा राप्रपासँग प्रधानमन्त्रीले गरेको छलफल पनि सकारात्मक भएको सुनाए ।

उनले भने, ‘राजेन्द्रजीसँग पनि प्रधानमन्त्रीले छलफल गर्नुभएको छ। उहाँहरू सकारात्मक हुनुहुन्छ। तर, अहिलेसम्म औपचारिक सहमति आएको छैन। उहाँहरूले मौखिक वा लिखित प्रतिबद्धता नआएसम्म भन्ने कुरा पनि भएन ।’

त्यसो त राप्रपाले कोशी सरकारबाट निर्णय गर्नको लागि भोलिका लागि पदाधिकारी बैठक बोलाएको छ।
नेता खनालले भने, ‘अब गठबन्धनभन्दा बाहिर गएर एमालेसँग मिल्ने सम्भावना सकियो। हामीले समस्याको समाधान हामीले पहिला गठबन्धनबाटै खोज्नुपर्छ। त्यही अनुसार सहमति हुन्छ ।’

कांग्रेसमा उद्धव थापालाई मुख्यमन्त्री बनाउने पक्षमा एकमत हुन नसक्ने परिस्थिती बनेपछि देउवाले माओवादीलाई सरकारको नेतृत्व दिन तयार भएको बताइन्छ ।

कोशी प्रदेशमा बहुमत पुग्न ४७ सीट आवश्यक पर्छ । कोशी प्रदेशमा सत्ता गठबन्धन दलमा रहेको नेपाली कांग्रेससँग २९, माओवादीसँग १३, एकीकृत समाजवादीसँग ४ र जनता समाजवादीसँग १ सीट छ ।

संविधानको धारा १६८ (३) अन्तरगत गठन भएको हिक्मत कार्की नेतृत्वको सरकारले असोज २० गते विश्वासको मत पाउन नसक्ने देखिएपछि कार्कीले मुख्यमन्त्रीबाट राजीनामा दिएका थिए ।

उनले राजीनामा दिएपछि प्रदेश प्रमुख परशुराम खापुङले संविधानको धारा १६८ (५) अन्तरगत सरकार गठनको भोलि साँझसम्मको लागि समय दिएका छन्।