विपक्षी दलका सचेतकले सभामुखसँग गरे छलफल (भिडिओ)

काठमाडौं । प्रतिपक्षी दलका प्रमुख सचेतकहरूले इजरायलको घटनालाई लिएर सभामुख देवराज घिमिरेसँग संसदमा संकल्प वा सार्वजनिक महत्वको प्रस्ताव पेश गर्नेबारे छलफल गरेका छन् ।

हमासको आक्रमणका कारण इजरायलमा फसेका नेपालीको उद्धारमा सरकारले ढिलासुस्ती गरेको भन्दै सदनमा गम्भीर रूपमा प्रस्तुत हुने एमालेका प्रमुख सचेतक पदम गिरीले बताए ।

उनले भने, ‘इजरायलमा १० नेपाली मृत्यु भएको छ । अहिले पनि धेरै नेपालीहरू बंकरभित्र भएको खानसमेत नपाएको, बाहिर कर्फ्यू भएकाले अप्ठ्यारो स्थितिमा भएको कुरा बाहिर आएको छ । यस विषयमा सरकारले गम्भीरतापूर्वक लिएर सरकारले त्यहाँ भएकालाई उपचारको व्यवस्था मिलाउनुपर्‍यो । नेपाल आउन चाहनेहरूलाई छिटोभन्दा छिटो नेपाल ल्याउने प्रबन्ध मिलानुपर्‍यो । भारतले आफ्ना नागरिकलाई २४ घण्टा नबिल्दै ल्याइसक्यो । तर, सरकारले यत्रा मान्छे मर्दा केही गर्न सक्दैन ।’

गिरीले घाइते नेपालीको उपचारको सम्बन्धमा ठोस पहल गर्न नसकेको भन्दै सरकारलाई निकम्माको संज्ञा दिए ।

उनले भने, ‘त्यस विषयमा सदनमा गम्भीर ढंगले जानुपर्छ एउटा स्थगनको प्रस्ताव होला वा सार्वजनिक महत्वको प्रस्ताव हुनसक्ला संकल्प प्रस्ताव दर्ता गरेर जाने हुनसक्ला ।’

राप्रपाले प्रतिनिधिसभा बैठकको नियमित कार्यसूची हटाएर इजरालयमा अलपत्र नेपालीहरुको उद्धारको विषयमा छलफल चलाउन माग गरेको छ ।

सभामुख घिमिरेको कार्यकक्षमा पुगेर राप्रपा प्रमुख सचेतक ज्ञानबहादुर शाही नेतृत्वको टोलीले बैठकको कार्यसूची परिवर्तन गर्न माग गरेका छन् । इजरालयमा अलपत्र नेपालीहरुको उद्दारका लागि सरकारले विशेष टीम बनाउनुपर्ने र त्यसको लागि प्रतिनिधिसभाले रुलिङ गर्नुपर्नेमा उनको जोड छ ।