सुब्बाको ‘गाउँ आएको बाटो’ टोरोन्टो इन्टरनेसनल फिल्म फेस्टिभलमा विश्व प्रिमियर हुँदै

काठमाडौं । नवीन सुब्बाको निर्देशन रहेको फिल्म ‘गाउँ आएको बाटो’ प्रतिष्ठित टोरोन्टो इन्टरनेसनल फिल्म फेस्टिभल, क्यानडामा वल्र्ड प्रिमियर हुने भएको छ । सेप्टेम्बर ७ देखि १७ तारिखसम्म सम्भालना हुने यस फेस्टिभलका लागि यस फिल्म छनोट भएको निर्देशक सुब्बाले जानकारी दिए ।

भोजपुरको आमचोक, भोजपुर बजार, संखुवासभाको खाँदबारी र सुनसरीको धरानमा छायंकन गरिएको यस फिल्मले गाउँमा सडक आएपछि बाबु छोराको सम्बन्धमा आउने उतारचढाव र दरारको कथा भन्छ । फिल्ममा दयाहाङ राई, पशुपति राई लगायत कलाकारको अभिनय रहेको छ ।

यसअघि सुब्बाको फिल्म ‘नुमाफुङ’ विभिन्न प्रतिष्ठित अन्तर्राष्ट्रिय फिल्म फेस्टिभलहरुमा छनोट तथा पुरस्कृत भएको थियो ।

सुब्बाका अनुसार अहिले फेस्टिभलको सिजन भएकाले ‘गाउँ आएको बाटो’ फेस्टिभलहरुमै जानेछ । त्यसपछि मात्रै नेपालमा रिलिज हुनेछ । सुब्बाले भने, ‘नेपालमा त त्यस्तै आउँदो फागुन, चैततिर रिलिज हुन्छ होला । अहिले चाहिँ फेस्टिभलकै सिजन भएकाले अन्तर्राष्ट्रिय फेस्टिभलहरु नै टार्गेट गरेका छौं ।’