जसपालाई जनकपुरधामको मेयर दिएपछि कांग्रेसका नेताहरू असन्तुष्ट

जनकपुरधाम । चुनावी तालमेलबारे सत्ता गठबन्धनले गरेको सम्झौता अनुसार जनकपुरधाम उपमहानगरपालिका जनता समाजवादी पार्टी (जसपा) को भागमा परेपछि नेपाली कांग्रेसका स्थानीय नेताहरू असन्तुष्ट बनेका छन् ।

सत्ता गठबन्धनले गरेको सम्झौता सार्वजनिक भए लगत्तै नेपाली कांग्रेस जनकपुरधाम उपमहानगरपालिका कमिटीको बैठक बसेको छ ।

जसपालाई मेयर दिएको विषयमा आवश्यक निर्णय लिन अहिले बैठक राखेको र अहिले छलफल चलिरहेको कांग्रेस नगर उपसभापति राकेश विक्रम साहले जानकारी दिए ।

उनले भने, ‘विगतको मत परिणाम हिसाबले पनि कांग्रेस मेयर पाउनुपर्थ्यो । तर जसपालाई दिइएको छ । यो निर्णयमा हाम्रो असन्तुष्टि छ । तर निर्णय मान्ने कि नमान्ने त्यो निर्णय अहिले बसेको बैठकले गर्छ । अहिले ठ्याक्कै केही भन्न सक्दिनँ ।’

सत्ता गठबन्धनले गरेको महानगरपालिका र उपमहानगरपालिका बाँडफाँडको सम्झौता पत्रमा जनकपुरधामको उपमेयर कुन दलले पाएको कुरा उल्लेख छैन ।