कांग्रेस केन्द्रीय सदस्यमा श्याम घिमिरेको उम्मेदवारी घोषणा

काठमाडौं । नेपाली कांग्रेसका केन्द्रीय सदस्य श्यामकुमार घिमिरे पुनः केन्द्रीय सदस्यमै उम्मेदवार बन्ने भएका छन् । घिमिरेले १४ औं महाधिवेशनमा खस आर्यतर्फबाट केन्द्रीय सदस्य बन्ने घोषणा गरेका छन् ।

१२ औैं महाधिवेशनपछि तत्कालीन सभापति सुशिल कोइरालाद्वारा केन्द्रीय सदस्यमा मनोनीत भएका घिमिरे १३ औं महाधिवेशनपछि सभापति शेरबहादुर देउवाद्वारा केन्द्रीय सदस्यमा मनोनीत भएका थिए । घिमिरेले यसपटक आफू प्रतिस्पर्धाबाटै केन्द्रीय समितिमा रहन चाहेको बताए ।

आफू सधैँ पार्टीभित्र एकता र संस्थागत निर्णयको पक्षमा रहेको बताउँदै घिमिरेले १४ औं महाधिवेशनपछि गुटगत तिक्तता समाप्त गर्नुपर्ने बताए । ‘म सधैं पार्टीभित्र संस्थागत निर्णय हुनुपर्छ र निर्वाचित सभापतिको भिजनमा अगाडि बढ्नुपर्छ भन्ने पक्षमा छु । महाधिवेशनमा प्रतिस्पर्धा त हुन्छ तर महाधिवेशनपछि तिक्तता बिर्सेर कांग्रेसको पक्षमा काम गर्न सबै सक्रिय हुनुपर्छ’, घिमिरेले भने ।

कांग्रेस केन्द्रीय सदस्यका रुपमा आफू पाएको जिम्मेवारी कुशलताका साथ निर्वाह गर्दै आएकोले महाधिवेशन प्रतिनिधिले मूल्यांकन गर्ने अपेक्षा रहेको घिमिरेले बताए । उनी कांग्रेसको केन्द्रीय लेखा समितिको संयोजक तथा क्रियाशील सदस्यता छानबिन समितिको सदस्यसमेत हुन् ।