साफअघि बंगलादेशका मुख्य प्रशिक्षक जेमी डे बर्खास्त, ब्रुजोन नियुक्त

काठमाडौं । दक्षिण एसियाली फुटबलको सबैभन्दा प्रतिष्ठित प्रतियोगिता साफ च्याम्पियनसिप नजिकै आइसक्दा बंगलादेश फुटबल फेडेरेसन (बीएफएफ)ले मुख्य प्रशिक्षक जेमी डेलाई बर्खास्त गरेको छ ।

सन् २०१८ देखि बंगलादेशी टोलीको नेतृत्व गरेका इङ्लिस प्रशिक्षक जेमीलाई बर्खास्त गर्दै बीएफएफले उनको स्थानमा बसुन्धरा किङ्ग्सका ओस्कार ब्रुजोनलाई नियुक्त गरेको छ ।

बंगलादेशले जेमीको नेतृत्वमा खेलेका २९ मध्ये ९ खेलमा जित हासिल गरेका थियो । बाँकी पाँच खेलमा बराबरी र १५ खेलमा पराजय भोगेको थियो । उनको स्थानमा नियुक्त भएका ब्रुजोनले डोमेस्टिक क्लब बसुन्धरा किङ्ग्सको प्रशिक्षण सम्हालिरहेका छन् ।

ब्रुजोनले स्पोर्टिङ गोवा, न्यु राडियान्ट र बसुन्धराबाट घरेलु प्रतियोगितामा सफलता हासिल गरिसकेका छन् । स्पेनिस प्रशिक्षक ब्रुजोनसँग स्पेनमै जुनियर लेभलमा बटुलेको अनुभव पनि छ ।

जेमीको नेतृत्वमा लगातार सात खेलमा जितविहीन रहेको बंगलादेश सेप्टेम्बरमा खेलेका दुई मैत्रीपूर्ण खेलमा पनि पराजित भएको थियो । पहिलो खेलमा प्यालेस्टाइनसँग २-० को नतिजामा पराजित भएको बंगलादेश दोस्रो खेलमा किर्गिस्तानसँग ४–१ को हार बेहोरेको थियो ।

जेमी बर्खास्त भएसँगै बंगलादेशले ब्रुजोनको नेतृत्वमा साफ च्याम्पियनसिप खेल्ने छ ।