नेपाल भर्सेस भारतः पहिलो हाफ गोलरहित बराबरी

काठमाडौं । नेपाल र भारतबीच जारी दोस्रो मैत्रीपूर्ण खेलको पहिलो हाफ गोलरहित बराबरीमा सकिएको छ । दुवैतर्फबाट गोलका लागि निरन्तर प्रयास भए पनि क्लिनिकल फिनिसिङ नहुँदा डेडलक कसैले तोड्न सकेनन् ।

तेज तामाङले १३औं मिनेटमा दिएको पासमा मनिष डाँगीले सुन्दर अवसरको पनि फाइदा उठाउन सकेनन् ।

भारतीय गोलकिपर अमरिन्दरसिंह आउट अफ पोजिसन हुँदा पनि बलमाथिको नियन्त्रण गुमाउँदा मनिष ६ यार्ड बक्सको घेराबाट गोल गर्न असफल रहे ।

शुरूआतमा भारतमाथि निरन्तर आक्रमण गरेको नेपालका लागि २२औं मिनेटमा पुजन उपरकोटीले पेनाल्टी एरियाबाहिरबाट गरेको प्रहार क्रसबार माथिबाट बाहिरिएको थियो ।

२४औं मिनेटमा मैदानको बायाँतर्फबाट बिपिन सिंहले गरेको क्रसलाई ६ यार्ड बक्स नजिक रहेका अनिरुध थापाले बल नियन्त्रणमा लिन नसक्दा नेपाली गोलरक्षक किरणले क्लियर गरेका थिए ।

नेपालका युवा खेलाडी आयुष घलानले २८औं मिनेटमा अट्याकिङ हाफको दायाँतर्फबाट गरेको सुन्दर क्रसमा आशिष लामाको हेडर प्रयास असफल भएको थियो ।

त्यसको दुई मिनेट नबित्दै भारतका अनिरुध थापाले पेनाल्टी एरियाभित्रबाट गरेको क्रसमा पुजनले ६ यार्ड बक्स नजिक महत्त्वपूर्ण इन्टरसेप्सन गर्दे नेपालको रक्षापंक्तिमा कुनै खतरा हुन दिएनन् ।

पहिलो हाफमा नेपालविरुद्ध छिटो-छिटो बल गुमाएको भारतले पोसेसन होल्ड गरेर बिल्ड गर्ने कोसिस गरेको थियो । तर, नेपालको इन्टरसेप्सन र सोलिड डिफेन्स छिचोल्न नसक्दा गोल गर्ने क्लियर मौका सिर्जना गर्न सकेन

नेपाली रक्षापंक्तिका लागि निरन्तर खतरा बनिरहेका अनिरुध थापाले ४१औं मिनेटमा प्रहार गरेको कर्नरमा चिङलेन सनाले प्रहार गरेको हेडर क्रसबार माथिबाट बाहिरिएको थियो ।