जर्जिन्हो बने यूईएफए प्लेयर अफ दी इयर

काठमाडौं । चेल्सीबाट च्याम्पियन्स लिग तथा इटालीबाट युरो २०२० च्याम्पियन बनेका जर्जिन्हो यूईएफए प्लेयर अफ दी इयर घोषित भएका छन् ।

गत सिजन चेल्सीलाई च्याम्पियन बनाउन महत्त्वपूर्ण भूमिका निर्बाह गरेका जर्जिन्होले इटालीले गत महिना युरो जित्दा पनि उत्कृष्ट प्रदर्शन गरेका थिए ।

🏆 He conquered Europe twice. Bravo, Jorginho – UEFA Men's Player of the Year! 👏👏👏#UEFAawards | #UCLdraw | @ChelseaFC pic.twitter.com/7sBtw8A4wy

— UEFA Champions League (@ChampionsLeague) August 26, 2021

उनीसँगै फ्रेन्च मिडफिल्डर एनगोलो कान्टे तथा बेल्जियन प्लेमेकर केभिन डी ब्रुयना पनि नोमिनेसनमा परेका थिए ।

महिलातर्फ बार्सिलोनालाई च्याम्पियन बनाउन महत्त्वपूर्ण भूमिका निर्बाह गरेकी एलेक्सिया पुटेलसले हात पारेकी थिइन । उनीसँगै बार्सिलोनाकै लिके मार्टिन्स र जेनिफर हर्मुसो पनि नोमिनेसनमा परेका थिए ।

वर्षको उत्कृष्ट गोलकिपरमा पुरुषतर्फ चेल्सीका एडुवार्डो मेन्डी र बार्सिलोनाकी सान्ड्रा पानोसले पाएका थिए । यस्तै वर्षको उत्कृष्ट डिफेन्डर पुरुषतर्फ म्यानचेस्टर सिटीका रुबेन डियाज र महिला तर्फ पेरिस सेन्ट जर्मन (पीएसी)की इरेन पेरेडेजले हातपारे ।

मिडफिल्डरमा चेल्सीका एन्गोलो कान्टे र बार्सिलोनाकी एलेक्सिया पुटेलस उत्कृष्ट घोषित हुँदा फरवार्ड भने बोरुसिया डर्टमन्डका एर्लिङ हालान्ड तथा बार्सिलोनाकी जेनिफर हर्मोसो बनेका थिए ।

त्यस्तै महिला टोलीको उत्कृष्ट प्रशिक्षक बार्सिलोनाका लुइस कोर्तेस घोषित हुँदा पुरुषतर्फ चेल्सी थोमस टुकेल वर्ष प्रशिक्षक चुनिएका थिए ।