भारतले काबुलबाट फिर्ता ल्यायो सबै कूटनीतिक कर्मचारी र अलपत्र नागरिक

काठमाडौं । सुरक्षा चासोका बीच भारतले काबुलबाट आफ्ना राजदूतसहित सबै कूटनीतिज्ञलाई उद्दार गरेको छ । भारतीय सेनाको विशेष विमानबाट उनीहरुलाई दिल्ली लगिएको हो ।

सो जहाजले कूटनीतिज्ञ, कर्मचारी, सुरक्षाकर्मी र अलपत्र केही भारतीय नागरिकसहित डेढसय जनालाई स्वदेश फर्काएको हो । भारतीय विदेशमन्त्री एस जयशंकरले उद्दार प्रक्रिया कठिन र चुनौतिपूर्ण भएको बताए ।

‘घरमा सुरक्षितपूर्वक फर्कन पाउँदा खुशि लागेको छ’ राजदूत रुडेन्द्र टन्डनले भारतीय मिडियासँग भने । राष्ट्रपति असरफ घानी देश छाडेर भागेको र तालिवानले सत्ता हातमा लिएपछि अहिले अफगानिस्तानको स्थिती तरल बनिरहेको छ ।

राजदूत टन्डनका अनुसार केही भारतीय नागरिक अहिले पनि काबुल विमानस्थलमा सुरक्षित घर फिर्तीको प्रतीक्षामा छन् । व्यवसायिक उडान सुरु हुने वित्तिकै उनीहरुलाई फिर्ता ल्याउने तयारी भैरहेको उनले जनाए ।