जीवा लामिछानेको नेतृत्वमा एनआरएनए फाउन्डेसनको गठन

काठमाडौं । विकास आयोजना संचालन गर्न १० अर्वको एनआरएन डेभलपमेन्ट फण्ड स्थापना गरेको गैरआवासीय नेपाली संघले परोपकारी गतिविधि सञ्चालन गर्न छुट्टै एनआरएनए फाउन्डेसन स्थापना गरेको छ ।

समाजमा विभिन्न क्षेत्रमा ख्याती कमाएका व्यक्तिहरु संलग्न फाउन्डेसनको प्रस्तावित अध्यक्ष एनआरएनका पूर्वअध्यक्ष जीवा लामिछाने रहेका छन ।

फाउन्डेसनमा पुर्वमुख्य सचिव लीलामणि पौड्याल, कुलचन्द्र गौतम, मनीषा कोइरालालगायत ख्यातिप्राप्त व्यक्तित्वहरु पनि यस फाउनडेनसमा आवद्ध भएको गैह्रआवसीय नेपाली संघका अध्यक्ष कुमार पन्तले जनाएका छन् ।

‘विश्वभर फैलिएका नेपालीले गर्ने परोपकारी कार्यलाई एकीकृत, अझ प्रभावकारी र पारदर्शी बनाउने उद्देश्यले छुट्टै फाउन्डेसन स्थापना गरेको हो’ पन्तले बताए ।

फाउन्डेसनमार्फत् संघले नेपालमा प्राकृतिक विपत्ति, शिक्षा, स्वास्थ्य, प्राचीन स्मारक जीर्णोद्धार, कला, संगीत आदि क्षेत्रमा सहयोग, वैज्ञानिक तथा श्रमिकको क्षमता अभिवृद्धि, खेलकुद विकास र गैरआवासीय नेपालीको उत्थान आदि क्षेत्रमा काम बताइएको छ ।