शरदसिंह भण्डारीको दावी- जसपा बनाएर हामीले उपेन्द्रको रेस्क्यू गरेका थियौं

काठमाडौं । जनता समाजवादी पार्टीका नेता शरदसिंह भण्डारीले जालझेल गरेर उपेन्द्र यादवले आफ्नो बहुमत निर्वाचन आयोगमा देखाए पनि त्यसबाट आफूहरू विचलित नभएको बताएका छन् ।

निर्वाचन आयोगमा सनाखतपछि पत्रकारसँग कुरा गर्दै भण्डारीले निष्ठा र अवसरवादमध्ये केही व्यक्तिले अदल-बदल गरेर अवसरवादी चरित्र देखाएको टिप्पणी गरे । उनले अब के गर्ने भन्ने बारे आयोगको निर्णय र अदालतको फैसलापछि हुने बताए ।

भण्डारीले एक वर्षअघि तत्कालीन राजपा र समाजवादी पार्टी एकीकरण गरेर आफूहरुले उपेन्द्र यादवको राजनीति जोगाइदिएकोमा अहिले बदलाभाव देखाएको आरोप लगाए । त्यसबेला उपेन्द्र यादवको ९ जना सांसदले अलग दल खोल्न सरकारमार्फत अध्यादेशसमेत ल्याइएको थियो ।

भण्डारीले भने, ‘हामीले अहिले विभाजन मागेको होइन । सबैलाई थाहा छ जसपा एकीकरणको बेला उपेन्द्र यादवको अनुहार र अवस्था कस्तो थियो जगजाहेर छ । साँच्चै भन्ने हो भने हामीले उपेन्द्रजीलाई रेस्क्यू गरेका थियौं ।’