अर्थमन्त्री पौडेलको प्रतिबद्धता- सबै नागरिकलाई गुणस्तरीय खोप निःशुल्क दिन्छौं

काठमाडौं । अर्थमन्त्री तथा विभाजित नेकपाका महासचिव विष्णु पौडेलले कोभिड विरुद्धको खोप सबै नागरिकलाई निःशुल्क उपलब्ध गराउन प्रतिबद्ध रहेको बताएका छन् । प्रेस संगठन नेपालको राष्ट्रिय भेलालाई विहीवार काठमाडौंमा सम्बोधन गर्दै अर्थमन्त्री पौडेलले गुणस्तरीप्य खोप निःशुल्क उपलब्ध गराइने बताए ।

पौडेलले भने, ‘हिजो हामीले निःशुल्क खोप उपलब्ध गराउँछौ भन्दा केही मान्छे पत्याउदैन थिए । आज हामी राष्ट्रिय अभिभारा र निर्वाचन गराउने दायित्व निर्वाह गरिरहँदा गुणस्तरीय खोप निःशुल्क उपलब्ध गराउने तयारी सरकारले गरेको छ र हामी त्यसबाट पछि हट्दैनौं ।’

अर्को प्रसंगमा महासचिव पौडेलले वैशाख १७ र २७ गते हुने निर्वाचनमा केपी ओली नेतृत्वको नेकपा बहुमत सहित देशको ठूलो दल बन्ने दाबी गरे । उनले जनतासँग विवेक र विश्लेषण गर्ने क्षमता रहेको भन्दै आउने चुनावमा जनताले ओलीमाथि न्याय गर्ने बताए ।

प्रचण्ड-माधव पक्ष चुनावी परिणामबाट डराएर निर्वाचनका गतिबिधि नगर्न दबाब दिदै निर्वाचन आयोगमा पुगेको पौडेलले बताए ।