मूल्यवृद्धि र कालोबजारी नियन्त्रण गर्न नेकपा एस निकट युवा संघले सरकारलाई दियो १० दिने अल्टिमेटम

काठमाडौं । सत्तारूढ घटक नेकपा एकीकृत समाजवादी निकट युवा संघ नेपालले आर्थिक संकटको मारमा परेका बखत कृत्रिम अभाव सृजना गरी मूल्यवृद्धि र कालोबजारी भएकोतर्फ सरकारको ध्यानाकर्षण गरेको छ ।

युवा संघका संयोजक कृष्ण विश्वकर्माको नेतृत्वको टोलीले उद्योग वाणिज्य तथा आपूर्तिमन्त्री रमेश रिजाललाई ज्ञापनपत्र बुझाउँदै उक्त ध्यानाकर्षण गराएको हो ।

मन्त्रीलाई ध्यानाकर्षणपत्र दिनुका साथै माग सम्बोधन गर्न सरकारलाई १० दिने अल्टिमेटम दिइएको संघका नेता मनोज खत्रीले बताए ।

संघले ज्ञापनपत्रमार्फत ‘सरकारले आम्दानी वृद्धि र रोजगारी सृजना गर्नतर्फ पहल नगर्ने त्यसमाथि महँगी नियन्त्रण पनि नहुने अवस्थाका विरुद्व जनआक्रोश चुलिएको सन्दर्भलाई बुझ्न विलम्ब नगरी जनताले प्रत्यक्ष अनुभूति गर्नेगरी खाद्यपदार्थलगायत अत्यावश्यक सामग्रीहरुको मूल्य समायोजन गरी राहत सृजना गराउन सरकारलाई १० दिन समय उपलब्ध गराएको अन्यथा आन्दोलनमा उत्रने चेतावनी दिएको छ ।