‘एक भागवत र एक गीता’ ले सकारात्मक प्रतिक्रिया पाएपछि झरना भन्छिन्- अंकभन्दा दर्शकको स्याबासी महत्त्वपूर्ण

काठमाडौं । शुक्रवारबाट प्रदर्शनमा आएको झरना थापाद्वारा निर्देशित ‘एक भागवत र एक गीता’ ले दर्शकहरूबाट राम्रो प्रतिक्रिया पाएको छ ।

दर्शकहरूले सकारात्मक प्रतिक्रिया दिएपछि निर्देशक थापा आफ्नो सिनेमाका लागि बक्स अफिसको अंकभन्दा दर्शकको स्याबासी महत्त्वपूर्ण बताउँछिन् ।

विशेष शो मा बोल्दै उनले भनिन्, ‘मलाई व्यापारिक सफलताभन्दा पनि प्रतिक्रिया महत्त्वपूर्ण लाग्छ । बक्स अफिस भनेको त हिजो पनि थियो मेरो । त्यसैले त्यसको त्यति धेरै चाहना छैन । मेरो चाहना चाहिँ दर्शकले स्याबासी दिउन् भन्ने हो, जुन यतिबेला मैले पाइरहेकी छु ।’

शुक्रवार आयोजित सिनेमाको विशेष शोमा सिनेमाकर्मी, पत्रकारलगायत उपस्थिति पाहुनाबाट निर्माण पक्षले उत्कृष्ट प्रतिक्रिया पाएको छ ।

सिनेमा हेर्न पुगेका निर्माता तथा निर्देशक आकाश अधिकारी, कलाकार किरण केसी लगायतले यो सिनेमाबाट नयाँ विषयमा बहस सुरु गरेको बताए ।

सिनेमा हेरेपछि अभिनेता धिरज मगरले भने, ‘सिनेमाले भन्न खोजेको कथाले दर्शकको मन छुन्छ जस्तो लाग्छ । यसको ब्याग्राउन्ड स्कोर, विपिन दाइ, सुहाना लगायतको अभिनय बेजोड छ । यो सिनेमामा काम गर्न पाएकोमा खुशी छु ।’

यता शुक्रवार एक भागवत र एक गीता सामाजिक कथा हेर्न राप्रपा नेपालका सांसद ज्ञानेन्द्र शाही पनि हल पुगेका थिए ।