उपनिर्वाचनले संसदीय गणितमा फरक नपार्ने भएकाले प्राथमिकतामै राखेका थिएनौं: राजेन्द्र लिङ्देन

काठमाडौं । राष्ट्रिय प्रजातन्त्र पार्टीका अध्यक्ष राजेन्द्र लिङ्देनले उपनिर्वाचनको मत परिणामले आत्तिनुपर्ने कुनै कारण नभएको बताएका छन्।काठमाडौंमा भएको कार्यकर्ता भेलालाई सम्बोधन गर्दै उपनिर्वाचनको मतपरिणामका कारणले निराशा हुन नपर्ने बताए।

उनले भने, ‘हामीले प्रारम्भदेखि नै उपनिर्वाचनलाई प्राथमिकतामा राखेका थिएनौं। गएको निर्वाचनमा पनि ती निर्वाचन क्षेत्रमा हाम्रो मत राम्रो थिएन। अहिले पनि यो उपनिर्वाचनमा आउने एकदुई सीटले राष्ट्रिय राजनीतिमा कुनै फरक पर्दैन। संसदीय गणितमा फरक पार्दैन भनेर प्राथमिकतामै राखेका थिएनौं। हामीले राम्रो मत प्राप्त गर्न सकेनौँ।’

अहिलेको व्यवस्था र व्यवस्था परिवर्तन गरे भन्ने दलहरुको विकल्पको खोजीमा जनता रहेको सन्देश उपनिर्वाचनले दिएको बताए। तीनवटा क्षेत्रमा भएको उपनिर्वाचनमा राप्रपाले उम्मेदवारी दिएपछि जमानत जफल भएको थियो।