मंसिर ४ मा प्रतिगमनकारीलाई परास्त गर्नुपर्छ : कृष्णलाल महर्जन

काठमाडौं । नेकपा एकीकृत समाजवादीका नेता तथा गठबन्धनबाट ललितपुर-२ का उम्मेदवार कृष्णलाल महर्जनले मंसिर ४ गते प्रतिगमनकारीलाई परास्त गर्नुपर्ने बताएका छन् ।

ललितपुरमा आयोजित गठबन्धनको चुनावी प्रशिक्षण कार्यक्रममा बोल्दै उनले एमाले अध्यक्ष केपी शर्मा ओलीले गलत बाटो लिएकै कारणले आफूहरूले विद्रोह गर्नुपरेको दाबी गरे ।

उनले भने, ‘हाम्रो तत्कालीन नेतृत्वले गलत बाटो विलयपछि विद्रोह गरेका हौँ । जनताको बलले नै हामीले सर्वोच्च अदालतबाट प्रतिनिधिसभा पुन:स्थापना गर्न सफल भएका छौं । त्यसैले मंसिर ४ गतेको निर्वाचनमा प्रतिगमनकारीलाई परास्त गर्नुपर्छ ।’

गठबन्धनको तर्फबाट फरक क्षेत्रमा फरक उम्मेदवार भएकाले सचेत भएर जिताउन लाग्न महर्जनको आग्रह थियो ।

उनले भने, ‘विगत पाँच वर्षको बीचमा जनताको सेवा गर्ने मौका दिनुभएको थियो । जनताको सबै समस्या लगेर लाजले शिर झुकाउने काम गरेको छैन । अब गर्ने पनि छैन ।’