नेकपा एस संसदीय दलको बैठक सुरू (भिडिओ)

काठमाडौं । नेकपा एकीकृत समाजवादीको संसदीय दलको बैठक सुरू भएको छ । संसद भवन नयाँ बानेश्वरमा बैठक अहिले बसिरहेको छ ।

जसपा विभाजनसँगै नेकपा एसमा पनि विभाजनको धाँजा फाटेको चर्चा चलिरहेका बेला माधव नेपालले दलको बैठक राखेका हुन् ।

नेकपा एसका असन्तुष्ट सांसदहरुलाई सम्झाउनका लागि नेपालले दलको बैठक बोलाएको नेताहरुले बताएका छन् । आफ्नो दल पनि विभाजन हुने सूचना नेपालले पाएको बताइन्छ । नेकपा एसमा १० सांसद छन् ।

नेकपा एसभित्र यहि सरकारमा बस्नुपर्छ भन्ने र बाहिर रहनुपर्छ भन्ने दुवै मत बलियो रुपमा प्रकट भइरहेका छन् । तर, नेकपा एसका सम्मानित नेता झलनाथ खनालले बाहिर चर्चा भएजस्तो आफ्नो पार्टी विभाजनतर्फ नगएको दाबी गरे ।

उपेन्द्र यादवसहित यो गठबन्धन छाडेर वैकल्पिक गठबन्धनबाट प्रधानमन्त्री बन्ने प्रयासमा तत्काल अवरोध भएपछि नेता नेपाल चिन्तित छन् । एमाले अध्यक्ष केपी शर्मा ओलीले माधव नेपाललाई अहिलेको सत्ता समिकरणबाट निकाल्न प्रधानमन्त्रीलाई संकेत गरिसकेका छन् ।

उपेन्द्र यादवलाई पनि उपप्रधानमन्त्रीबाट हटाएर उनको ठाउँमा विभाजित जसपाका सांसदलाई मन्त्री बनाउने तयारी छ । प्रमुख सचेतक मेटमणी चौधरीका अनुसार बैठकले अबको पार्टीको रणनीति बनाउनेछ ।