रेसुङ्गा कांग्रेसले सार्वजनिक गर्‍याे सङ्कल्प पत्र, समुन्नत नगर बनाउने लक्ष्य

गुल्मी । नेपाली कांग्रेस रेसुङ्गा नगरपालिका गुल्मीले स्थानीय तह निर्वाचनका लागि सङ्कल्प पत्र सार्वजनिक गरेको छ ।

जिल्ला पार्टी कार्यालय बीपी स्मृति भवन तम्घासमा कांग्रेसका केन्द्रीय सदस्य चन्द्र केसी, लुम्बिनी प्रदेश उपसभापति भुवन प्रसाद श्रेष्ठ, जिल्ला सभापति तथा रेसुङ्गा नगरपालिका प्रमुख पदका उम्मेदवार खिलध्वज पन्थी, उपप्रमुख पदका उम्मेदवार अमृतादेवी कुँवर, प्रदेश प्रतिनिधि राजेन्द्रप्रसाद श्रेष्ठ, सङ्कल्प पत्र लेखन समितिका संयोजक दीन पन्थी लगायतले आठ पेजको सङ्कल्प पत्रको सार्वजनिक गरेका हुन् ।

‘सबल स्थानीय सरकार ः समुन्नत रेसुङ्गा नगर भन्ने मूख्य नारा बनाई उक्त सङ्कल्प पत्र सार्वजनिक गरिएको छ ।

सात रङ्गहरुको संयोजनबाट सिर्जित इन्द्रेणीले प्रेम, समृद्धि, प्रेरणा, उर्जा, तत्परता, सद्भाव र समुन्नति जस्ता विषयको दिशावोध गरेझैं हामीले गर्ने सम्पूर्ण गतिविधिलाई विशेषगरी सङ्कल्प पत्रमा समाविष्ट शिक्षा तथा खेलकुद, स्वास्थ्य, पर्यटन, कृषि, उद्योग वाणिज्य तथा रोजगार, शहरी विकास, खानेपानी, सरफाई तथा विपद् व्यवस्थापन, सडक, भौतिक पूर्वाधार तथा सामाजिक विकास लगायतलाई समेटेर रेसुङ्गाका सात रङ्ग भनेर उल्लेख गरेको रेसुङ्गा नगरपालिका प्रमुख पदका उम्मेदवार पन्थीले बताए । उनले सङ्कल्प पत्रमा लखिएका सबै कुराहरुलाई पुरा गरेर छाड्ने दाबी गरे ।

घोषणापत्रमा शिक्षा, स्वास्थ्य, पर्यटन, पूर्वाधार निर्माण लगायतका कामलाई प्राथमिकतामा राखिएको छ ।