गगनको टिप्पणी- दिनरात हामीलाई टिभीमा हेरेर वाक्क दिक्क भइसकेकाहरू नेपालमा केही छैन भन्दैछन् (भिडिओ)

काठमाडौं । नेपाली कांग्रेसका महामन्त्री गगन थापाले नयाँ पुस्ताका युवाहरूसँग नेपाली समाजमा केही पनि छैन भन्ने डरलाग्दो भाष्य स्थापित हुँदै गएकोप्रति चिन्ता व्यक्त गरेका छन्।

काठमाडौंमा आयोजित एक कार्यक्रममा बोल्दै केही हुँदैन भन्ने गलत भाष्य चिर्न आवश्यक रहेको बताए।

उनले भने- नयाँ पुस्ताहरूमा नेपाली समाजमा केही पनि छैन, केही पनि भएको छैन, कसैले केही पनि गरेको छैन। हिजो पनि भुत्ते थियौँ, आज पनि त्यस्तै छौँ भन्ने खालको पछिल्लो समय जबरजस्त बनेको भाष्य डरलाग्दो छ।

उनले अवसरको खोजीमा बाहिर युवायुवती जानु स्वभाविक भए पनि अस्तित्व र पहिचान पनि बिस्तारै भाग्न थालेको जस्तो आभास हुन थालेको बताए।

उनले भने- हाम्रा केटाकेटीहरू नेपाल छाडेर जान लागे भन्ने कुरा डरलाग्दो होइन। हाम्रा बाहरू अवसर खोज्न काठमाडौं आएको जस्तै नयाँ पुस्ताहरूले पनि अवसर खोज्दै बाहिर जाने भए, तर मुख्य कुरा यो आफ्नो माटो, ठाउँ, हाम्रो अस्तित्व र पहिचान बिस्तारै भाग्न थालेको जस्तो आभास हुन थालेको छ। हामी समाजमा कुराकानी गर्दा, खास गरी टेलिभिजनमा दिनरात हामीलाई हेर्दा हेर्दा घरका मान्छेहरू वाक्क दिक्क भएर, घरका मान्छेले हामीलाई गाली गर्दा गर्दा। थाहा नपाईकन सिंगो समाजलाई पनि अब हामीसँग केही पनि छैन नेपालमा केही हुँदैन भन्न थालेका छन्।