जनगणनामा सही तथ्यांक दिन प्रदेश २ का मुख्यमन्त्रीको आग्रह

जनकपुरधाम । प्रदेश २ का मुख्यमन्त्री लालबाबु राउतले जनगणनामा सही तथ्यांक लेखाउन प्रदेशवासीसँग अपिल गरेका छन् ।

जनगणनाका लागि खटेका सुपरिवेक्षक वा गणकहरुलाई सही विवरण टिपाउन मुख्यमन्त्री राउतले अपिल जारी गरेका हुन् । तथ्यांक संकलन गर्न घरमा आउने गणकलाई आत्मीय व्यवहार गर्न पनि उनले आग्रह गरेका छन् ।

मुख्यमन्त्री राउतले जारी गरेको अपिलमा भनिएको छ, ‘गणकहरुले सोधेको सबै प्रश्नहरु धैर्यतापूर्वक सुनेर सही जवाफ दिन प्रदेश सरकार सम्पूर्ण प्रदेशवासी दाजुभाई, दिदी बहिनीहरुलाई हार्दिक अनुरोध गर्दछ।’

यसपटकको जनगणनामा रोजगार, बेरोजगार, बैंक तथा वित्तीय संस्थामा पहुँचाको अवस्था, सरकारी अनुदान प्राप्त गरे–नगरेको, वडा तहसम्म सामुदायिक भवनहरुको अवस्था के कस्तो छ ? जस्ता मसिना तर नागरिकका लागि अति नै महत्वपूर्ण विषयका प्रश्नावली पनि समेटिएकोले धैर्यपूर्वक जवाफ दिन उनलेआग्रह गरेका छन् ।

यस्तै सामाजिक बहिष्करणमा परेका समूहहरु दलित, जनजाति, अल्पसंख्यक, लोपोन्मुख, महिला, अपाङ्गता भएका व्यक्ति आदिको जनसंख्याको अवस्था के छ भन्ने कुरा जनगणनाले छर्लङ्ग पार्ने भन्दै मुख्यमन्त्रीले राउतले भनेका छन्– यही तथ्यांकलाई आधार बनाएर सम्बन्धित जाति, धार्मिक समुदाय, महिला वा अपाङ्गता भएका व्यक्तिका लागि प्रदेश सरकारले नीति र कार्यक्रम बनाउनेछ ।