भोजपुरमा नेकपा एसको जिल्ला कमिटी घोषणा, शरण एमालेमै बसेपछि वीरजंगलाई ल्याइयो

भोजपुर । नेकपा एमालेबाट विभाजित भएर बनेको नयाँ पार्टी नेकपा (एकीकृत समाजवादी) को जिल्ला कमिटी घोषणा गरिएको छ ।

वीरजंग राईको अध्यक्षमा १५५ सदस्यीय जिल्ला कमिटी बनाइएको हो । यसअघि समानान्तर कमिटीका अध्यक्ष शरणकुमार राईले पार्टी फुटलाई साथ नदिइ एमालेमै बस्ने निर्णय गरेपछि वीरजंगलाई अध्यक्ष बनाइएको हो । उनी जेठ २ अघिको एमालेमा जिल्ला सचिवालय सदस्य थिए । माओवादीसँग एकतापछि बनेको नेकपामा वीरजंगलाई कार्यालय सदस्यको जिम्मेवारी दिइएको थियो ।

नेकपा एसको नवगठित जिल्ला कमिटीको उपाध्यक्षहरूमा विष्णुबहादुर राउत, चक्र तामाङ र गीता राईले जिम्मेवारी पाएका छन् । सचिवमा ममिता राई छिन् । उनी भोजपुर नगरपालिकाकी उपमेयर हुन् । उपसचिवमा ईश्वर कार्की चयन भएका छन् ।

अखिल नेपाल महिला संघकी केन्द्रीय अध्यक्ष जयन्ती राईको उपस्थितिमा कमिटी घोषणा गरिएको हो ।

पदाधिकारी र सदस्यको सपथ र जिल्ला भेला केही दिनमा तय गरिने युवा नेता सन्दीप राईले जानकारी दिए ।