एक सातामै भुटानले लगायो ९० प्रतिशत जनसंख्यालाई खोप

थिम्पु । भुटानले एकसातामै कूल जनसंख्याको ९० प्रतिशत योग्य नागरिकलाई कोभिड-१९ विरुद्धको खोप लगाएको छ । बालबालिका सम्बन्धी राष्ट्रसंघीय नियोग युनिसेफले यसलाई सफलताको कथा र आशाको किरण भएको बताएको छ ।

कूल ७ लाख ७० हजार जनसंख्या भएको भुटानमा खोप अभियानलाई सफल बनाउन स्वास्थ्यकर्मीले देशव्यापी खोप आपूर्तिमा सघाएका थिए ।

भुटानले दोस्रो डोज खोप लगाउने अभियान अन्तर्गत दुर्गम भेगमा हेलिकोप्टरमार्फत खोप आपूर्ति गरेको थियो । मंगलबारसम्म कूल खोप लगाउने लक्षित जनसंख्या ५ लाख ३० हजारमध्ये ४ लाख ८० हजारलाई खोप लगाइएको छ । युनिसेफका भुटानी प्रतिनिधि विल पाक्र्सले यसलाई सम्भवतः विश्वकै छिटो खोप अभियानमध्येको एक भएको बताए ।