ल्होत्से र पुमरी हिमाल आरोहण शुरु

सोलुखुम्बु । जिल्लाको खुम्बुस्थित सगरमाथा क्षेत्रमा पर्ने ल्होत्से हिमाल आरोहण शुरु भएको छ ।

आरोहणको बाटो बनाउन डोरी टँगाइ (रोप फिक्सिङ) का लागि गएका ६ सदस्य आरोहीले सोमबार साँझ ८,५१६ मिटर अग्लो ल्होत्से चुचुरामा पुगेको संस्कृति, पर्यटन तथा नागरिक उड्डयन मन्त्रालय, पर्यटन विभागले जनाएको छ ।

विभागका निर्देशक मीरा आचार्यका अनुसार ल्होत्से आरोहणका लागि १४ आरोही समूहका ९६ महिला र २९ पुरुष आरोहीले आरोहण अनुमति लिएका छन् । वसन्त यामको पहिलो सिजनमा ल्होत्से आरोहण पनि औपचारिक रुपमा शुरु भएको छ ।

त्यसैगरी पुमरी (७,१६१ मिटर) हिमालको सफल आरोहण पनि भएको छ । चार नेपाली र दुई भारतीयले आज अपराह्न हिमाल आरोहण गरेको विभागले जनाएको छ । चालु याममा पुमरी आरोहणमा नौ आरोहीलाई अनुमति दिइएको छ ।

वसन्त याममा सगरमाथासहितका विभिन्न हिमालको आरोहण जारी छ । सगरमाथा आरोहण यही वैशाख २४ देखि शुरु भएको थियो । कीर्तिमानी कामीरिता शेर्पा नेतृत्वको १२ जनाको शेर्पा आरोही समूहले सगरमाथाको चुचुरामा डोरी टाँग्ने कार्यसँगै व्यावसायिक आरोहण शुरु भएको हो ।

संस्कृति मन्त्रालयका अनुसार वसन्त यामको हिमाल आरोहणमा ७९ देशका ८६ आरोही समूहमा जम्मा ७७४ जना आरोहीले आरोहण अनुमति लिएका छन् । तीमध्ये सगरमाथाका मात्रै सर्वाधिक ४३ आरोही समूहका ४०८ आरोही छन् ।

रासस