माइतीघरमा आजबाट प्रचण्ड-माधव पक्षको धर्ना (भिडियो)

काठमाडौं । प्रतिनिधिसभा विघटनविरुद्ध आन्दोलनरत नेपाल कम्युनिष्ट पार्टी (नेकपा) पुष्पकमल दाहाल प्रचण्ड-माधवकुमार नेपाल पक्षले बुधबार माइतीघरमा धर्ना दिएको छ ।

धर्नामा विघटित प्रतिनिधि सभा सदस्य, संविधानसभा सदस्य तथा प्रदेशसभा सदस्यहरू सहभागी थिए । नेकपा प्रचण्ड-माधव पक्षकी स्थायी कमिटी सदस्य तथा विघटित प्रतिनिधिसभा सदस्य पम्फा भुसालले असंवैधानिकरुपमा संसद विघटन गरी देशलाई प्रतिगमनतर्फ फर्काउने उल्टो कदम सच्याउनको निम्ति धर्ना बसेको बताइन् ।

संविधान, संघीयता, गणतन्त्र र जनमतको रक्षाको निम्ति धर्ना बसेको उनको भनाइ थियो । विघटित प्रतिनिधिसभाका सदस्य हरिबोल गजुरेलले जनताले आफ्नो प्रतिनिधिमार्फत बनाएको संविधानमाथि हस्तक्षेप भएको हुँदा धर्ना बस्नुपर्ने आवश्यकता रहेको बताए ।

‘संविधानको रक्षा गर्न र जनतालाई संविधानको रक्षाको निम्ति आउने विश्वासका साथ धर्नामा बसेका हौं’, गजुरलेलले भने । नेकपा प्रचण्ड(माधव पक्षले प्रतिनिधि सभा विघटनको बिरोधमा आन्दोलनको विभिन्न कार्यक्रम आयोजना गर्दै आएको छ । बुधबारदेखि शुरु भएको धर्ना शनिबारबाहेक माघ २१ सम्म प्रत्येक दिन २ घण्टा बस्ने बताइएको छ ।