युरो २०२०: पहिलो हाफमा जर्मनीविरुद्ध फ्रान्स १-० ले अगाडि

काठमाडौं । जर्मनीका डिफेन्डर म्याट्स हुमल्सले २०औं मिनेटमा गरेको गोलसँगै युरो २०२० को समूह ‘एफ’ अन्तर्गत जारी खेलको पहिलो हाफमा फ्रान्सले १-० को अग्रता लिएको छ ।

जर्मनीको घरेलु मैदान एलिनाज एरिनामा जारी प्रतिस्पर्धात्मक खेलको १९औं मिनेटमा फ्रेन्च लेफ्ट ब्याक लुकास हर्नान्डेजले गरेको क्रसमा हुमल्सको बल क्लियर गर्ने प्रयास गोलमा परिणत भएको थियो ।

२०१४ र २०१८ का दुई विश्वकप विजेताबीच जारी खेलमा दुवै तर्फबाट गोलका लागि निरन्तर प्रयास भए पनि फिनिसिङ अपेक्षित भइरहेको छैन ।

जर्मनीले अहिलेसम्म युरोपियन फुटबल च्याम्पियनसिपको पहिलो खेल हारेको छैन । तर अहिले जारी खेलमा भने ३ पटकको युरो च्याम्पियन जर्मनी पहिलो हाफमा १-० ले पछि परेको छ ।

सुरुआतदेखि नै आक्रामक खेलको १७औं मिनेटमा फ्रान्सका युवा फरवार्ड किलियान एम्बाप्पेले गरेको प्रहार जर्मन कप्तान म्यानुएल नोएरले बचाएका थिए ।

जर्मनीका लागि गोल खाएको एक मिनेट नबित्दै थोमस मुलरले हेडरमार्फत गरेको प्रहार फ्रेममा परेको थिएन ।