जुन ९ देखि लन्डनमा ‘नेपाली फिल्म फेस्टिभल इन लन्डन’ आयोजना हुने

काठमाडौं । ‘नेपाली फिल्म फेस्टिभल इन लन्डन २०२४’को आयोजना हुने भएको छ । बेलायतको राजधानी लन्डनमा दोस्रो पटक यो महोत्सव आयोजना हुन लागेको हो ।

आयोजकले थर्ड आई लिमिटेडका अध्यक्ष विकास देवकोटाले सात दिनसम्म यो महोत्सव चल्ने जानकारी दिए । महोत्सवमा १० वटा नेपाली फिल्म प्रदर्शन गरिनेछ ।

बेलायतमा नेपाली फिल्म फेस्टिभलको आयोजनाले नेपाली कला र संकृतिको प्रवर्द्धन हुने जानकारी दिँदै भने, ‘हामी नेपाली परिवेश र नेपाललाई चिनाउने फिल्म लन्डनमा देखाउने छौँ । यसले नेपाली फिल्मको बजार विस्तारमा टेवा पुराउनेछ । साथमा, नेपाली कला, संस्कृतिलाई पनि प्रवर्द्धन गर्नेछ ।’

यो महोत्सवले नेपाली फिल्म के–कस्ता बनिरहेका छन् भन्ने बारेमा समेत प्रवासी नेपालीलाई थाहा हुने र नयाँ नयाँ स्वाद बोकेका फिल्म प्रदर्शन गर्दा विदेशी बजार समेत विस्तार हुने बताइएको छ ।

थर्ड आइले करिब ४० जना हाराहारीमा फिल्मीकर्मी, पत्रकार र विभिन्न क्षेत्रका व्यक्तिहरू महोत्सवमा सहभागी हुने बताएको छ । महोत्सव जुन ९ तारिखबाट सुरु हुने महोत्सव जुन १५ तारिखसम्म चल्नेछ ।

आयोजकले यो महोत्सवमा ५० वटा फिल्मको आवेदन पर्ने आशा गरेको छ । जसबाट दश वटा फिल्म मनोनयन गर्ने र पाँचलाई सम्मान गर्ने तयारी गरिएको छ ।

आयोजकले महोत्सवमा भाग लिन चाहने फिल्म मेकरले थर्ड आइको फेसबुक पेजमा गएर आवेदन दिन सक्ने बताएको छ ।