एमालेको डिलमा धकेलिँदै डा. भीम रावल, गृहजिल्लाकै कार्यक्रममा ‘बाइपास’ भएपछि के भन्छन् ?

काठमाडौं । एमालेको जारी झुलाघाट-चिवाभञ्ज्याङ संकल्प पदयात्राका क्रममा शनिबार अध्यक्ष केपी शर्मा ओलीसहित शीर्ष नेताहरु अछामको मंगलसेन पुगेर आमसभा गरे । अछाम सुदूरपश्चिमका लोकप्रिय एमाले नेता डा. भीम रावलको गृहजिल्ला हो । तर, आफ्नै दैलोमा पार्टीले भव्य कार्यक्रम गर्दा रावल अनुपस्थित रहे ।

एमालेले रावललाई कार्यक्रममा निम्त्याइएको दाबी गरेको छ । एमाले सुदूरपश्चिम प्रदेश कमिटीका कृष्णप्रसाद जैशी आफूले अभियानबारे नेता रावललाई जानकारी दिएको बताएका थिए ।

उनी भन्छन्, ‘मैले उहाँलाई प्रदेश कमिटीको तर्फबाट जानकारी गराएको थिएँ । तर, उहाँले केन्द्रका नेताहरुलाई सोध्न भन्नुभयो । केन्द्रबाट ‘तपाईंले भनेपछि भइहाल्यो नि’ भन्ने कुरा गर्नुभएको थियो । तर, उहाँ आउनुभएन ।’

रावलले भने आफूलाई सही तवरबाट निम्तो नै नगरिएको बताए । उनले ट्विटरमा यस्तो लेखेका थिएः

एमालेको मध्य पहाडी पुष्पलाल राजमार्ग अभियानबारे धनगढीमा आयोजित पत्रकार सम्मेलनमा मेरोबारेमा सोधिएको प्रश्नको जवाफमा मलाई निम्तो दिइएको भन्ने सत्य होइन । तथ्य यस्तो छ, प्रदेश अध्यक्ष कृष्णप्रसाद जैसीले फोनमा पत्र पठाउँ कि भन्नुभयो । मैले भनें- अभियान प्रदेशको भए तपाईंले भन्दा म आइहाल्थें । तर, केन्द्रको भएकोले तपाईं अध्यक्षलाई फोन गरी मेरो सहभागिताको कुरा गर्नस्, उहाँले मलाई भन्नुभयो भने म सहभागी हुन्छु ।

केही समयपछि उहाँले फोनमा भन्नुभयो- फोन गरें, अध्यक्षको स्वकीयसँग कुरा हुँदा महासचिवसँग कुरा गर्न भनियो । महासचिवसँग कुरा गर्दा ‘इच्छा हुनेले जाँदा हुन्छ’ भन्ने जवाफ आएकाले तपाईं झुलाघाट जानु परेन अछाम आफ्नै किसिमले गए हुन्छ । अब सबै विवेकशील व्यक्तिले सोचौं । यही हो त मलाई अभियानमा निम्ता गरिने कायदा ?’

नेपाल प्रेससँगको कुराकानीमा पनि नेता रावलले आफूलाई आमन्त्रण नगरेकै कारणले कार्यक्रममा नगएको दोहोर्‍याए ।

उनले भने, ‘पार्टीले विभिन्न पदका व्यक्तिहरुलाई सहभागिता जनाउनु भनेर निर्देशन जारी गरेको रहेछ । त्यसमा मलाई कतै पनि पारिएन । त्यसैले यो अभियानमा म सहभागी हुने अवस्था बनेन ।’

नेता रावलको बारेमा एमाले नेता कर्ण थापाले आफू अहिले पार्टी निर्माणको अभियानमा रहेकाले त्यसबारे कुरा गर्न उपयुक्त नहुने टिप्पणी गरे ।

जे भए पनि एमालेले पछिल्ला दिनमा डा. रावललाई भित्तातिर ठेल्दै लगेको सत्य हो । १०औं महाधिवेशनमा रावल ओलीसँग अध्यक्षमा भिडेका थिए । त्यसदेखि यता उनी ओलीको कोपभाजनमा पर्दै आएका छन् । ओलीसँग सम्बन्ध चिसिएकै कारण गएको मंसिर ४ को प्रतिनिधिसभाको निर्वाचनमा उनले टिकट पाएनन् । जिल्ला कमिटीले रावलको एकल नाम सिफारिस गरेर पठाएको भए पनि केन्द्रले काटिदिएको थियो ।

त्यसपछि ओलीविरुद्ध नेता रावल थप आक्रामक बने । उनी पार्टी गतिविधिविरुद्ध लागेको भन्दै पार्टीभित्र रहने वा नरहने भन्ने कित्ता क्लियर गर्न एमालेले गत चैतमा उपाध्यक्ष विष्णु पौडेलको संयोजकत्वमा तीन सदस्यीय वार्ता टोली गठन गर्‍यो । समितिमा लेखराज भट्ट र कर्ण थापा पनि थिए । तर, त्यो समितिले कुनै निष्कर्षमा पुर्‍याउन सकेन ।

वार्ता समितिको आग्रहपछि ओलीले साउन ३० गते रावललाई पार्टी मुख्यालय च्यासलमै बेलाएर भेटेका थिए । दुई नेताबीच करिब २० महिनापछि भएको भेटमा ‘फेरि भेट्ने’ बाहेक अर्को समझदारी भएन । त्यसयता ओलीले रावलका विषयमा चासो दिन छोडेको बताइन्छ ।

लामो समय पार्टी गतिविधिमा निष्क्रिय रावल पछिल्ला दिनमा केही कार्यक्रममा देखिएका थिए । तर, अहिले जारी मध्यपहाडी लोकमार्ग केन्द्रित १९ दिने अभियानमा उनी निष्क्रिय बने । यसै विषयमा केन्द्रित रहेर डा. भीम रावलसँग गरिएको संक्षिप्त कुराकानीः

– पार्टीले झुलाघाट-चिवाभञ्ज्याङ संकल्प यात्रा गरिरहेको छ । तर, तपाईंको सहभागिता देखिएन नि ?

पार्टीले विभिन्न पदका व्यक्तिहरुलाई सहभागिता जनाउनू भनेर निर्देशन जारी गरेको रहेछ । त्यसमा व्यक्ति नै तोकिएको थियो । मलाई कतै पनि पारिएन । मलाई त्यो कार्यक्रममा सहभागी नहुने स्थिति बनाइयो । त्यस सम्बन्धमा पार्टी नेतृत्वले पनि कुनै कुरा नगरेकाले मैले सहभागी हुने अवस्था बनेन ।

– हिजो तपाईंकै गृहजिल्लामा भएको कार्यक्रमको त जानकारी थियो होला नि ?

मलाई मेरो गृहजिल्ला अछाममा पार्टीको कार्यक्रम हुँदैछ भनेरसम्म कुनै जानकारी छैन ।

– पार्टी अध्यक्षसँग च्यासलमा पुगेर फेरि भेट्न सहमति गरेर फर्किनुभएको थियो । त्यसपछि पनि मिलनबिन्दु भेट्नुभएन र ?

ओलीजीसँग भएको भेटलाई मैले सकारात्मक भयो भनेको छैन । उहाँहरुले आफ्नो ढंगबाट कुरा बाहिर ल्याउनुभयो । मैले मेरो कुरा भनें । त्यो कुराकानी र त्यसपछिको व्यवहार हेर्दा, त्यो कुराकानी भनेको उहाँहरुको व्यवहार उचित छैन भन्ने कुरा पार्टीभित्र र बाहिर धेरै ढंगले उठ्न थालेपछि एउटा नाटकमात्रै गरेको हो कि भन्ने मलाई लागेको छ ।

– तर, वार्तामा फेरि भेट्ने सहमति भएको होइन ?

वार्तामा फेरि कुरा गर्ने कुरा भएको हो । तर, त्यसपछि प्रदेशको अधिवेशन भयो । अहिले यो कार्यक्रम भयो । ती कार्यक्रममा मप्रति जस्तो व्यवहार देखाइएको छ । त्यो कुराकानी भनेर फगत दुनियाँलाई देखाउन र भ्रमित गराउन गरेको भन्ने मलाई लागेको छ । त्यसपछि अहिलेसम्म मसँग कसैले केही कुरा गरेको छैन ।

– भनेपछि अब तपाईंको एमालेमा बस्ने सम्भावना सकिँदै गएको हो ?

मैले अहिले केही सोचेको छैन । म आज अछाम जाँदैछु । मैले उहाँहरुको व्यवहार जस्तो हुन्छ, मेरो पाइला त्यस्तै हुन्छ भन्दै आइरहेको छु । तर, अहिलेसम्म यसै गर्छु भनेर निर्णय गरिहालेको स्थिति छैन ।

– यसले त तपाईंलाई पार्टीबाट धकेल्न खोजे जस्तो देखियो नि ?

त्यो कुरा मैलेभन्दा उहाँहरुले नै जान्ने कुरा हो । अहिलेसम्मका घटनाक्रमले जे संकेत गरेको छ, मैले त्यही विश्लेषण गरेको हो । थप मैले केही सोचेको छैन अहिलेलाई ।