इन्डियन आइडलको थियटर राउन्डमा मेनुका- फेरि पाइन् तीनै जजको ‘स्ट्यान्डिङ ओभेसन’

काठमाडौं । इन्डियन आइडलको अडिसनमा तहल्का मच्चाएकी नेपाली गायिका मेनुका पौडेलले थियटर राउन्डमा पनि निर्णायकहरुको उच्च प्रतिक्रिया पाएकी छन् । उनी अडिसनमा गोल्डेन माइक पाएर सिधै थियटर राउन्डका लागि छनोट भएकी थिइन् ।

मेनुकाले दिएको प्रस्तुतिको पूरा एपिसोड प्रशारण हुन बाँकी छ । तर, उनको सानो फुटेज युट्यूवमा सार्वजनिक गरिएको छ । मेनुकाले पुरानो हिन्दी फिल्म ‘तुम्हारे लिए’ का लागि लता मंगेशकरले गाएको गीत ‘तुम्हे देखती हुँ तो लगता है ऐसे…’ गाएर निर्णायकको मन जितेकी हुन् ।

यो एपिसोडमा तीन नियमित जजमध्येकी एक श्रेया घोषाल अनुपस्थित छिन् । उनी सांगीतिक टुरका लागि देशबाहिर रहेकाले थियटर राउन्डमा उपस्थित हुन नसकेकी हुन् । उनको स्थानमा प्रख्यात गायिका कविताकृष्ण मुर्तिलाई निम्त्याइएको छ ।

मेनुकाको प्रस्तुतिलाई तारिफ गर्दै संगीतकार विशाल ददलानीले भने, ‘तिम्रो आवाजले संगीतलाई परिभाषित गर्छ ।’

प्रस्तुतिपछि तिनैजना जजले उठेर ताली बजाएका छन् । यो एपिसोडबाट टप १५ को छनोट हुने छ । मेनुका छनोट भए–नभएको भिडिओमा खुलाइएको छैन ।