नयाँ हल सञ्चालनमा ल्याउँदै दीपकको घोषणा– फिल्म निर्मातालाई ५० प्रतिशत सेयर दिन्छौं

काठमाडौं । कलाकार जोडी दीपकराज गिरी र दीपाश्री निरौलाले निर्माण गरेको मल्टिप्लेक्स सिनेमा हल आजबाट सञ्चालनमा आएको छ । नयाँ वानेश्वरस्थित एनबी सेन्टरमा रहेको हल आइएनआइ सिनेमाजको फ्रेन्चाइजीको रुपमा उनीहरुले हल सञ्चालन गरेका हुन् ।

हल उद्घाटनका अवसरमा बोल्दै दीपक दीपाले नेपाली फिल्मलाई प्राथमिकता दिने प्रतिवद्धता व्यक्त गरे । उनीहरुले नेपाली फिल्म निर्मातालाई ५० प्रतिशत सेयर दिने घोषणा पनि गरेका छन् ।

गिरीले भने, ‘सेयर बाँडफाँडमा निर्माताहरुको असन्तोष छ । हलवाला र निर्माताको हातमा आम्दानीको बराबर हिस्सा होस भन्ने हाम्रो मान्यता हो । हामी यो हलमा आजकै मितिबाट नेपाली चलचित्रको हकमा ५०÷५० प्रतिशत सेयर बाँडफाँड हुने छ ।’

गिरीले अन्य सिनेमाहरुले पनि यो सूत्रलाई पछ्याउने आशा व्यक्त गरे । राम्रो गर्दागर्दै नेपाली चलचित्रले स्थान नपाउने अवस्था नआओस भन्नेमा आफूहरु सचेत रहने पनि उनले बताएका छन् ।

‘फिल्म हेर्न दर्शक नै आएनन् भने त माया प्रेमले मात्र हुँदैन, तर राम्रो चल्दाचल्दै नेपाली फिल्मले शो नपाउने अवस्था चाहीँ नआओस भन्नेमा हाम्रो प्रयास रहनेछ,’ उनले भने ।