झरना-सुनिलले भने- भागवत गीताको विवाद मिलाउन भुवन केसीले सहयोग गर्नुभयो, अनमोल छोराजस्तै

काठमाडौं । नामलाई लिएर चलेको लामो विवादको अन्त्यपछि आज राजधानीमा एक कार्यक्रमको आयोजना गरी चलचित्र ‘एक भगवत एक गीता(सामाजिक कथा)’ को अफिसियल गीत सार्वजनिक गरिएको छ । चलचित्रको सम्पूर्ण टीमको उपस्थितिमा गीत सार्वजनिक कार्यक्रम समापन गरिएको हो । सार्वजनिक ‘झिँझिँया’ बोलको गीतमा नायिका सुहाना थापा र नायक विपिन कार्की फिचर्ड छन् ।

कार्यक्रममा निर्माण टीमले चलचित्रबारे आफ्ना धारणाहरु राखेका थिए। चलचित्रको नामबारे विवाद चक्रिएपछि र सेन्सर पास नहुने भएपछि धेरैले विकास बोर्डलाई औंला उठाएका थिए । चलचित्र विकास बोडर्का अध्यक्ष भुवन केसीले सेन्सर पास गर्न नदिएको धेरैको आरोप थियो । आफ्ना छोरा अनमोललाई चलचित्रमा नलिएकाले भुवनले भड्स पोखेको आलोचना उनलाई लागेको थियो ।

कार्यक्रममा सोही आलोचनाबारे प्रश्न गरिएको थियो ।

आलोचनाबारे बोल्दै निर्माता सुनिल कुमार थापाले भने, ‘अनमोल मेरो परिवारको सदस्य हो । मेरो छोरा जस्तै हो । उसले मेरो प्रोड्क्सनबाट २ वटा चलचित्र गरिसक्यो । आउने दिनमा पनि हामीसँगै नै हुनेछौ । यी सब हल्ला मात्र हुन् । भन्नेको मुख कसले छेक्न सक्छ र ? भुवन केसीले त विवाद मिलाउन हामीलाई सहयोग गर्नुभएको छ । उहाँप्रति हामीलाई कुनै गुनासो छैन । कुरा रह्यो अनमोलको । उसलाई हाम्रो चलचित्रको कहानी सबै थाहा छ । उसलाई सुरुमा नै यो चलचित्रमा अफर थिएन । म यो कहानीमा फिट छैन भनेर उसलाई पहिलै थाहा थियो ।’