समानुपातिक मत जोगाउने एसको रणनीतिप्रति गठबन्धन लचिलो, प्रदेशका ‘बागी’ मैदानमै
नेपाल प्रेस
२०७९ असोज २६ गते १०:४७
काठमाडौं । सत्ता गठबन्धनको सीट भागबण्डामा अधिकांश जिल्ला र क्षेत्रमा उम्मेवारविहीन हुने अवस्था आएपछि मनोयन दर्ता गरेका प्रदेश सभा तर्फका उम्मेदवारहरुप्रति शीर्ष तहमा लचिलो बन्ने सहमति भएको छ ।
नेकपा एसले गठबन्धनमा १९ सीट प्रतिनिधिसभातर्फ र प्रदेशतर्फ ३३ मध्ये ३७ सीट पाएकोमा केही ठाउँमा कांग्रेसले दोहोरो उम्मेदवारी दिएको छ ।देशका १४५ प्रतिनिधि सभा र करीव ३ सय प्रदेश सभामा आफ्ना उम्मेदवार नहुँदा समानुपातिकमा मत नआउने र त्यसको असर थ्रेसहोल्ड कटाउँन पर्ने भएकाले नेकपा एसले प्रदेशका आफ्ना उम्मेदवारप्रति लचिलो बन्न शीर्ष तहमा आग्रह गरेको छ ।
स्रोतका अनुसार शीर्ष तहमा अनौपचारिक सहमति भएरै नेकपा एसले ३०/३५ ठाउँमा प्रदेशतर्फ आफ्नै उम्मेदवार उठाएको छ । त्यसमा वागमती,सुदूरपश्चिम र कर्णालीका पर्छन् । प्रतिनिधि सभाका उम्मेदवार फिर्ता गराएर प्रदेशका हकमा कतिपय ठाउँमा लचिलो बनेर छाड्ने सहमति भएको स्रोतले जनाएको छ ।
नेकपा एसका एक नेताले भने–हाम्रो उपस्थिति नै दुई तिहाई भन्दा बढी जिल्ला र क्षेत्रमा नहुने भएपछि समानुपातिकमा प्रत्यक्ष असर पर्ने भयो । त्यसले गर्दा थ्रेसहोल्ड कटेन भने भोलि समानुपातिकमा हाम्रो सीट नै नआउँने हुन्छ । त्यसैले प्रदेशका कतिपय उम्मेदवारलाई कायमै राख्ने कुरा छ । संघका चाहिँ फिर्ता हुन्छन् ।
नेकपा एसका उम्मेदवार कायमै रहँदा पनि गठबन्धनको जितमा असर नपर्ने ठाउँमा उनीहरुलाई मैदानमै छाड्ने तयारी छ ।
नेपाल प्रेस
प्रकाशित: २०७९ असोज २६ गते १०:४७
प्रतिक्रिया
सम्बन्धित खवर
