पञ्चा सिंहलाई हटाएर विशेष महाधिवेशन बोलाउन असन्तुष्ट पक्षको माग – Nepal Press

पञ्चा सिंहलाई हटाएर विशेष महाधिवेशन बोलाउन असन्तुष्ट पक्षको माग

अखिल क्रान्तिकारी विवाद

काठमाडौं । नेकपा माओवादी केन्द्रनिकटको विद्यार्थी संगठन अखिल (क्रान्तिकारी) को असन्तुष्ट पक्षले अध्यक्ष पञ्चा सिंहलाई तत्काल पदमुक्त गर्न पार्टी नेतृत्वसमक्ष माग गरेको छ ।

संगठनभित्रको विवादबारे रिपोर्टस क्लबमा उपाध्यक्ष पवन कार्की समूहले पत्रकार सम्मेलन गरेर विशेष राष्ट्रिय महाधिवेशनको मागसमेत गरेको छ ।

यस विषयमा पार्टीका शीर्ष नेतालाई समे ध्यानाकर्षण गराइएको कार्कीले जानकारी दिए ।

‘विद्यार्थी आन्दोलनले आजसम्म सोचेको जति उपलब्धी हासिल गर्न सकेन । विद्यार्थीको हकहितको लागि काम गर्नुपर्ने अखिल (क्रान्तिकारी) आफ्नै संगठनभित्रको समस्यामा रुमलिएको छ’, कार्कीले भने ।

जनसरोकारका मुद्दा उठाउनुपर्ने संगठन नै अराजक गतिविधिमा फसेको भन्दै उनले तत्काल अहिले भएको अवैधानिक निर्णयहरु खारेज गर्नुपर्ने माग गरे ।

२२औं राष्ट्रिय सम्मेलनले अध्यक्षमा पञ्चा सिंहलाई मात्र जबर्जस्ती निर्वाचित गरेको उनको दाबी थियो । त्यही सम्मेलनबाट सुरू भएको विवाद तेस्रो विस्तारित बैठकसम्म आइपुग्दा छताछुल्ल भएको कार्कीले बताए ।

उनले भने,‘त्यतिबेला जबर्जस्ती विधानविपरीत कमिटी घोषणा गरियो ।’

केन्द्रीय सदस्य बालकुमार केसीले अध्यक्ष सिंहले ३० वर्षदेखि लागेका विद्यार्थी नेताहरुलाई संगठनका नेतृत्वमा बर्जित गरेर तानाशाही व्यवहार देखाएको आरोप लगाए ।

पदाधिकारीहरुले राखेका जायज माग सम्बोधन नगरेर उल्टै कारबाही गरेकोमा उनको आक्रोश छ ।

प्रतिक्रिया

Leave a Reply

Your email address will not be published.

सम्बन्धित खवर