ओमानविरुद्धको मैत्रीपूर्ण खेलमा ७-२ ले हार्‍यो नेपाल

काठमाडौं । कतारमा भएको मैत्रीपूर्ण फुटबल खेलमा नेपाली राष्ट्रिय टोली ओमानसँग ७-२ गोलको नतिजामा पराजित भएको छ । साफ च्याम्पियनसिपको तयारीमा रहेको नेपाली टोलीले ओमानसँग तयारी स्वरुप ओमानसँग मैत्रीपूर्ण खेल खेलेको थियो ।

बलियो टोली ओमानलाई सहज जित दिलाउन अब्दुल्लाहजिज अल मुक्बालीले दुई तथा फामी शेद, मोसेन जाहेर, इसाम अल शुभी, मोहसेन अल घासनी र जमिल एल यह्मादीले एक/एक गोल गरे ।

दोहास्थित कतार युनिभर्सिटीको मैदानमा भएको खेलको पहिलो हाफमा २-१ को अग्रता लिएको ओमानले दोस्रो हाफमा पाँच गोल थपेर एक गोल मात्र खायो ।

साफ च्याम्पियनसिपका लागि भोलि माल्दिभ्स प्रस्थान गर्ने नेपाली टोलीले अक्टोबर १ (शुक्रबार)मा आयोजकको सामना गर्नेछ ।

प्रतियोगिताको १३औं संस्करणसम्म आइपुग्दा फाइनल पुग्न असफल नेपाली टोली यसपटक त्यो यात्रा गर्ने तयारीमा छ ।