बुबा र मामाबाटै ७ वर्षीय बालकको अपहरण ! सात घण्टाभित्रै उद्धार

जनकपुरधाम । धनुषाको नगराईन नगरपालिका ६ बाट अपहरणमा परेका एक बालकको प्रहरीले सकुशल उद्धार गरेको छ ।

अपहरणमा परेका रमेश दासका ७ वर्षीय छोरा चन्दनलाई जनकपुरधामस्थित एक होटलबाट शनिबारै राति उद्धार गरेको प्रदेश प्रमुख डीआईजी धीरजप्रताप सिंहले जानकारी दिए ।

उनले भने, ‘बच्चालाई अपहरण गर्नेहरूले फिरौती मागेको म्यासेज आएलगत्तै अनुसन्धान शुरू गर्‍यौं । सात घण्टाभित्रै बालकलाई सकुशल उद्धार गर्न सफल भयौं ।’

शनिबार दिउँसो १ बजेदेखि नै चन्दन हराएका थिए । बालकको आफन्तको मोबाइलमा फोनमार्फत फिरौती मागिएपछि प्रहरीमा खबर पुगेको थियो । डीआईजी सिंहले घटनामा संलग्न तीनजना पक्राउ परेको र अनुसन्धान शुरू गरिएको नेपाल प्रेसलाई बताए ।

पक्राउ पर्नेमा बालकका बुबा र दुईजना मामा रहेको प्रहरी स्रोतले बताएको छ । अपहरणमा बुबा र मामाकै संलग्नता देखिएपछि प्रहरी नै आश्चर्यमा परेको छ ।

घटनाको विस्तृत विवरण धनुषा प्रहरीले पत्रकार सम्मेलन गरी सार्वजनिक गर्ने तयारी गरिरहेको छ ।