इण्डोनेसिया र पूर्वी टिमोरमा बाढी-पहिरोका कारण ५० बढीको मृत्यु

एजेन्सी । इण्डोनेसिया र पूर्वी टिमोरमा आइतबार अविरल वर्षापछि आएको बाढी र पहिरोका कारण कम्तिमा ५० जनाको मृत्यु भएको छ ।

लगातार भइरहेको भारी वर्षाका कारण तटबन्धहरुमा पानी ओभरफ्लो भएर थुप्रै टापूका हजारौं घर जलमग्न भएका छन् ।

बाढी र पहिरोका कारण इण्डोनेसियाको पूर्वी क्षेत्र फ्लोर्स टापूदेखि छिमेकी देश पूर्वी टिमोरसम्म नराम्ररी प्रभाविक भएका छन् ।

इण्डोनेसियाको आपतकालीन उद्दार एजेन्सीका प्रवक्ताका रादित्य जातीका अनुसार चार उप–जिल्ला र सात गाउँमा बाढीको नराम्रो असर परेको छ । ‘प्रभावित क्षेत्रमा रहेका हाम्रो टिमको जानकारी अनुसार अहिलेसम्म ४१ जनाको मृत्यु भएको छ र २७ जना अझै हराइरहेका छन् । ९ जना घाइते छन्,’ उनले भने ।

तर पूर्वी फ्लोर्स राज्यका अधिकारीहरुले आफ्नो क्षेत्रमा कम्तिमा ६० जनाको निधन भएको बताएका छन् । राष्ट्रिय सरकारले यसको पुष्टि गरेको छैन ।

उता पूर्वी टिमोरको राजधानी जिलीमा बाढीका कारण कम्तिमा ११ जनाको निधन भएको छ ।