नेकपा विवादको असर प्रदेश २ मा पनिः कुन सांसद कसको पक्षमा ? (सूचीसहित)

जनकपुर । नेकपा केन्द्रको विवादको असर प्रदेशसभामा पनि परेको छ । पार्टी फुटको अन्तिम चरणमा प्रदेश नम्बर दुईको प्रदेशसभाका सदस्य पनि कित्ताकाट भएका छन् ।

प्रधानमन्त्री एवम् नेकपा अध्यक्ष केपी शर्मा ओली पक्षधर सांसदले प्रतिनिधिसभा विघटन हुनुलाई सकारात्मक लिएका छन् भने प्रचण्ड–माधव पक्षधर सांसदले गलत भनेका छन् । उक्त समूहले विरोधस्वरुप प्रधानमन्त्रीको पुत्लासमेत दहन गरेका छन् ।

नेकपा संसदीय दलका नेता सत्यनारायण मण्डल ओली पक्षमा उभिएका छन् । उनले संसद भंग गर्ने ओली र राष्ट्रपतिको कदम जायज र संवैधानिक भएको दाबी गरे । उनले संसद भंग गर्नुलाई असंवैधानिक भन्नेलाई ‘मुर्ख’ भनेका छन् ।

तत्कालीन नेकपा एमालेका संसदीय दलका नेतासमेत रहेका उनले ओलीलाई ‘शेर’को संज्ञा दिँदै भने, ‘शेरलाई पिँजडामा बन्द गरेर चारैतिरबाट भाला र खुकुरीले मार्न खोजेपछि के गर्छ ?’

तर तत्कालीन एमालेबाटै निर्वाचित कतपय सांसद ओलीको कदमको विरोध गर्छन् । सिरहा क्षेत्र ३ (२)बाट निर्वाचित सांसद प्रमोदकुमार यादवले ओलीको कदम निरंकुश भएको टिप्पणी गरे । ओलीले लोकतन्त्र, संघीयता, गणतन्त्र र जनताको बलिदानीविरुद्धको कदम भएको उनको भनाइ छ ।

उनले भने, ‘ड्राइभर नै त्रिशुलीमा गएर खस्यो भने के गर्ने ? जनताले विगतमा पनि संघर्ष गरेकै थियो । फेरि पनि गर्छन्’ उनले भने ।
अर्का सांसद दिलिप साहले संसद भंग गरेर प्रधानमन्त्री ओलीले देश र जनतामाथि गद्दारी गरेको आरोप लगाए ।

ओलीभन्दा प्रचण्ड–माधव समूह बलियाे

प्रदेश २ मा तत्कालीन नेकपा एमालेका २१ र माओवादी केन्द्रका ११ सांसद छन् । दुवै दलबीच एकीकरण भएर नेकपा बनेपछि कुल ३२ सांसद भए ।

तत्कालीन नेकपा एमालेका ८ सांसद प्रचण्ड–माधव समूहमा जाने लगभग निश्चित छ । २१ मध्ये अन्य केही सांसद पनि प्रचण्ड–माधवतिर लाग्ने बताइएको छ । तत्कालीन माओवादी केन्द्रका ११ सांसदले प्रचण्ड–माधव समूहलाई नै साथ दिने बुझिएको छ ।

प्रचण्ड–माधव पक्षमा लागेका तत्कालीन माओवादीका सांसद

१. कुन्दनप्रसाद कुशवाहा
२. दिल्लीप्रसाद उप्रेती
३. दिलिपकुमार साह
४. प्रमिलाकुमारी यादव
५. फुलियादेवी सदाय
६. भरतप्रसाद साह
७. महम्मद समीर
८. रामकुमार यादव
९. रामचन्द्र मण्डल
१०. रुबीकुमारी कर्ण
११. ज्वाला कुमारी साह

प्रचण्ड–माधव समूहमा लागेका तत्कालीन एमालेका सांसद

१. अशोककुमार यादव
२. गोबिन्दबहादुर न्यौपाने
३. मन्जुकुमारी यादव
४. शत्रुधन महतो
५. शारदादेवी थापा
६. सीता गुरुङ
७. हसिमा खातुन
८. प्रमोदकुमार यादव

ओली पक्षमा लागेका तत्कालीन एमालेका सांसद

१. सत्यनारायण मण्डल
२. सुन्दर बहादुर विश्वकर्मा
३. अनिता कुमारी यादव
४. किशोरी साह कमल
५. जगतारैन देवी सुडीन
६. नागेन्द्र राय यादव
७. मनोजकुमार सिंह
८. रबिन्द्र बैठा धोवी
९. लगनलाल चौधरी
१०. बेची लुंगेली
११. त्रिलोकी प्रसाद
१२. दिल्लीप्रसाद उप्रेती
१३. मदनसेन प्रताव श्रीबास्तव