हिमाली जिल्लामा चुनाव जितेका मधेशी समुदायका एक्ला अशोक

सोलुखुम्बु । विश्वकै अग्लो शिखर सगरमाथा भएको जिल्ला हो सोलुखुम्बु । हिमाल चढ्नेहरुको जिल्ला भनेर चिनिने सोलुमा जनजाति समुदायको बाहुल्यता रहेको छ ।

२०१५ सालको निर्वाचनताका वीपी कोइरालाले ‘मधेशबाट पहाडी र पहाडबाट मधेशीले चुनाव जितेको दिन नेपालमा प्रजातन्त्र बलियो हुने’ अभिव्यक्ति दिएका थिए । अहिले सोलुबाट मधेशी समुदायका अशोक झा केन्द्रीय महाधिवेशन प्रतिनिधिमा निर्वाचित भएका छन् । हिमाली जिल्लाबाट कांग्रेस महाधिवेशन प्रतिनिधि चुनिने झा एकमात्रै मधेशी समुदायका प्रतिनिधि हुन् ।

नेपाल तरुण दलको जिल्ला अध्यक्ष समेत रहेका झा कांग्रेस विधान अनुसार अल्पसंख्यक तर्फबाट महाधिवेशन प्रतिनिधि निर्वाचित भएका हुन् । उनले निकटतम प्रतिस्पर्धी कान्छीराज थुलुङलाई पराजित गरे । हिमाली जिल्लाबाट महाधिवेशन प्रतिनिधि बन्न पाउँदा खुसी लागेको झाले बताए ।

‘मधेशको मान्छे हिमाली जिल्लामा सबैको माया पाएर चुनाव जित्नु खुसीको कुरा हो । वीपीले भनेझै जात नभएर मेरो राजनीतिक क्रियाशीलता हेरेर मतदाताहरुले न्याय गर्नुभएको छ’, झाले भने ।

उनले कांग्रेसभित्र राजनीति गर्न र अवसर प्राप्त गर्न जात वा पहिचानले बाधा नगर्ने सन्देश दिएको बताए । दोस्रो पटक महाधिवेशन प्रतिनिधि निर्वाचित भएका झा कांग्रेसभित्र सबै पहिचानका व्यक्तिहरुले सम्मानजनक भूमिका पाउने बताए ।